Sikkim : SDF party hotuin banna a thehlut

Sikkim Democratic Front (SDF) party dintu zinga mi, minister hlui Garjaman Gurung chuan an party aṭanga banna a thehlut a, an party tlakchhiat chhanah party hotu, chief minister hlui Pawan Kumar Chamling a puh bawk.

Garjaman Gurung hi hun eng emaw chen aṭang khan party chhungah lungawi lohna neiin, an party pawh a sawisel fo ṭhin a ni.

SDF president Pawan Chamling hnenah banna lehkha a thehluhah, "Party-ah hian democracy a lal tawh lo. Party president leh a chhungte duh dan ang chauhin a kal tawh a ni. Tun hma lam chuan mi hrang hrang aiawhtu a ni ṭhin a, tunah erawh chuan party president chhungkaw tan chauh a ding tawh a ni. Chhungkaw bil tana a thawh tawh avangin he party-a ka awm zel hi a ṭulna ka hre lo a, hei vang party chhuahsan mai loh chu thlan tur dang a awm lo," tiin Gurung hian a ziak.

Gurung chuan SDF president chu mahni chauh inngaihtuah nia puhin, kum 30 chhung midangte'n party tana tha an lo thawh tawhnate en kanah a puh bawk.

Kum 25 chhung zet Sikkim-a roreltu an nih hnuah, kum thum eptu lamah an awm tawh a, hemi kum rei lote chhung hian an party chuan tlakhniam lam a pan zel a ni tih a sawi. Pawan Chamling kaihhruaina hnuaiah party member leh thlawptute chu an zalen lo niin a sawi bawk.

Eptu lama an awm hnuah an party chuan an dik lohna leh insiamṭhat ngaihna laite ngaihtuah loin, sorkar lai dik lohna zawnga, a phiar zawng ringawtin hma a la a ni, tiin Gurung chuan a sawi.