Meghalaya Assembly-in GST Bill pass
Meghalaya Assembly chuan Thawhṭanni khan Meghalaya Goods and Services Tax Bill 2017 a pass.
GST Bill hi Taxation Minister Zenith M Sangma chuan pharhin, special session-ah member-ten lungrual takin an pass a ni.
Assembly Speaker A T Mondal chuan Bill hi voice vote hmanga pass a nih thu sawiin, member-te chungah lawmthu a sawi a ni. Mondal chuan chhiah lak dan thar hman a nih dawn tak avangin chhiah lak dan bithliah thar a ni dawn tih sawiin, item eng emaw zatah chhiah sang zawk lak a ni dawn tih a sawi. Hetih lai hian hnam hnuaihnung te thlai thar leh ei tur thar chhuah aṭangin chhiah lak a ni dawn lo tih a sawi.
Assembly-ah hian opposition member-te chuan Meghalaya Goods and Services Tax Bill 2017 hi chiang zawka sawifiah an phut a, chhiah lak dan tura ruahman sa ṭhenkhat te chu an sawisel bawk. Chhiah lak dan tura ruahmanna siam ṭhenkhat chu GST Council ennawn leh tura dah an phut a, dry fish aṭanga chhiah lak zat tih hniam an phut bawk. Rawtna angin item ṭhenkhata chhiah lak zat chu GST Council ennawn leh tura tih a ni a, dry fish aṭanga chhiah 12% lak tura tih pawh, 5%-ah tihhniam remtih a ni bawk.
Special session-ah hian sorkar laipuiin talh atana bawng hralh leh lei khapna dan a tihchhuah chungchang sawilan a ni a, duhlohna resolution an pass a ni.
Chief Minister Mukul Sangma chuan resolution hi a pu lut a, sorkar laipui thupek hian Prevention of Cruelty to Animals (Regulation of Livestock Markets) Rules, 2017 a bawhchhia niin a sawi. Dan bawhchhiatna a nih mai bakah ram economy nghawng thei a nih thu sawiin, hnam hrang hrang culture rahbeh sakna a ni, a ti. Sorkar laipui khapna hian state chhunga mi nuai 5.7 vel zet eizawnna a nghawng thei dawn niin a sawi a, hnam leh sakhaw hrang hrangte zalenna palzut sakna a ni, a ti bawk.
Hill State People’s Democratic Party MLA Ardent Miller Basaiawmoit chuan an party chuan resolution siam hi an thlawp thu a sawi a, United Democratic Party legislator Paul Lyngdoh pawhin an thlawp thu a sawi. Hetih lai hian National People’s Party legislator James Sangma chuan resolution siam hi a thlawp ve lo thung.