Assam CM-in Ramsa himna ngai pawimawh

Assam Chief Minister Sarbananda Sonowal chuan tuilian avanga ramsa thihna a thlen loh­na turin Kaziranga Natio­nal Park, Golaghat leh Nagaon Park hotute chu hma la turin a ngen.

Assam CM chuan kum tin tuilian avangin ramsa eng emaw zat an thi ṭhin tih sawiin, a bikin Park chhunga ramsa te an thih nasat ṭhin thu a sawi. Hetiang thil hi a thlen tawh lohna turin Park enkawltute chu hma la turin a ngen a, district hrang hrang thuneitute pawh hma la turin a hriattir tawh. Fur a inṭan chhoh leh mek avangin he lamah thawktute chu fimkhur tura chahin, mipuite himna tur ngaih­tuah chunga ramsa te chunga harsatna a thlen lohna tura hma la turin a ngen a ni.

Sonowal chuan an state tihmingṭhatu samak-te chu ngaih pawimawh an ngai zual tih sawiin, khawvel huapa an hmel pho langtu a nih avangin humhalh an ngai zual tih a sawi. Assam chu khaw­vela samak ki pakhat nei tamna ber a nih thu sawiin, mang mai thei dinhmunah an awm avangin humhalh an ngai tak zet a ni, a ti. Kum hmasa lamahte tuilianin Park a chim avanga samak tam tak an thi chu pawi a tih thu sawiin, hetiang thil hi a thlen tawh lohna turin state sorkar chuan theihtawp a chhuah dawn tih a sawi.

Assam-ah hian kum 2016 khan tuilianin Park a chim avangin ramsa eng emaw zat an thi a, heng zinga hian ramsa la puitling lo ṭhahnem tak an awm. Nikuma tuilian nasa tak khan Kaziranga National Park ram chhung 80% zet chu a chim a, hei hi remchangah hmangin sapeltute chuan samak eng emaw zat an kap a ni. Assam CM chuan hemi chungchang hi sawiin, sapeltute chetna titawp turin hma lak a ni a, kuminah pawh ven­himna hi khauh zawka kalpui a nih tur thu a sawi. Kaziranga, Golaghat leh Nagaon park-ahte venhimna khauh tak kalpui a nih thu sawiin, sapeltute chu dim an ni dawn lo, a ti.

Sonowal hian tunhnai khan Kaziranga National Park-a thuneitute chu Kohora Range-ah high level meeting a neihpui a, ramsa te himna tur thil hrang hrang an sawiho a ni. He hunah hian District pahniha deputy commissioner leh superintendent of police-te pawh an tel. Kaziranga National Park hi World Heritage Site-ah puan a ni a, India ram mai ni lo khawvel hmun hrang hrang aṭangin tlawhtu an ṭhahnem thei hle a ni. Assam Forest Minister Pramila Rani Brahma chuan Kaziranga Park humhalh chu a ngaih pawimawh thu a lo sawi fo tawh a, park hi a tlawh fo bawk. State sorkar mai bakah sorkar laipui pawhin Park tihchangtlunna tur hian sum leh pai a lo ruahman sak tawh bawk.