Tripura Congress MLA-in BJP hruaitu venhimna pek dilsak

Tripura-a Congress legislator Ratan Lal Nath chuan Union Home Ministry hnenah, an state-a Bharatiya Janata Party (BJP) hruaitu Sunil Deodhar chu venhimna pe turin a ngen sak.

Congress MLA chuan BJP hruaitu Sunil Deodhar hian social media lamah thaha vauna a dawng niin a sawi a, hei vang hian venhimna ṭha tak pe turin Union Home Ministry-ah hian a thlen a ni. Deodhar himna turin Central para-military forces tir tura ngenin, thil ṭha lo zawk a thlen hmaa hma la thuai turin a ngen. Congress MLA chuan hemi chungchang hi Home Ministry-ah ziaka a thlen thu sawiin, a nunna tiderthawng thei thil a ni,a ti. BJP thupuangtu Mrinal Kanti Deb chuan Deodhar chungchangah hian eng thu mah sawi chhuah a la nei lo.

Hetih lai hian Congress party chuan an MLA Nath chetdan hi duh loin, party dan kalha cheah an puh. PArty thuchhuah chuan Nath hian BJP hruaitu

ṭhenkhat meeting a neihpui niin an sawi a, chung zingah chuan BJP National President Amit Shah bakah, state BJP chief Biplab Kumar Deb-te pawh an tel niin an sawi. Tripura state Congress President Birajit Sinha chuan Nath hi state assembly House chhungawh pawh Prime Minister Narendra Modi thlawp zawngin a lo ṭawng tawh niin a sawi a, a chungchang hi party chuan a ngaihtuah ṭha leh dawn a ni,a ti. Ratan Lal Nath pawh hian Congress President hnen aṭanga show-cause notice a dawn ngei thu a zep lo a, mahse eng thu mah a sawi belh lo. Amah hi state assembly-ah Congress ticket-a ṭum nga thlan tlin tawh a nih avangin a chetdan hian sawizui a hlawh hle a ni.

Tripura-ah hian Congress hian tlakhniam lam an pan zel niin a lang a, tunhnaiah party chhuahsan an awm fo avangin MLA 10 an neih ṭhin chu pathumah a tlahniam tawh a, House member an neih tlem ber ṭum an tawng mek a ni. Hetih lai hian rorel lai Left Front chuan member 51 a nei thung.