Hmarchhakin tuilian tuar mek Assam-ah mi pathum thi tawh

Tun hnaia ruah sur nasa tak chuan hmarchhak hmun hrang hrangah harsatna a thlen a, Assam-ah chuan tuilian avangin mi pathum an thi tawh. Hetihlai hian Mizoram-ah pawh ruah sur nasa avanga chhiatna hrang hrang thlengah mi 10 an thi tawh a, in leh lo chan eng emaw zat an awm bakah, leimin avangin hmun tam tak chu kalpawh theih lohin a awm mek.

Assam khawpui Guwahati chu tui lian hian nasa takin a tibuai a, lirthei veivahna a tibuai nasa a, rel service thlengin a buai a ni. Thawhlehni khan mi pathum chu tui lian avang hian an thi a, mi nuai chuangin harsatna hi an tawk mek. Nunna chan pahnih - Anwar Hussain Barpeta leh Pushan Kalita-te hi Maria’s Public School-a pawl kaw zirlai an ni a, tuilianin electric ban a tihtluk avanga current-in a man te an ni. He thil thleng hi Kamrup (Metropolitan) Deputy Commissioner Dr M. Angamuthu chuan chhui chian a nih tur thu sawiin, judicial enquiry din a ni dawn tih a sawi. Vanduaina tawk chhungte hi cheng nuai li ṭheuh pek an nih tur thu a sawi bawk. Bharalu lui lian chuan mi pakhat a la bawk a, amah hi Pintu Das a ni tih finfiah tawh a ni. Pintu Das hi midang chhanchhuah a tumna lamah tui lian hian a la ta nia tarlan a ni.

Chief Minister Sarbananda Sonowal chuan chhiatna a thlen hnu hian a programme neih sate a ṭhulh thu a puang a, tuilian tuarte chu sorkarin theih ang angin a ṭanpui dawn tih a sawi. Sonowal hi Karbi Anglong District-a vantlang hmuna thu sawi tur a a ni a, Karbi Anglong Autonomous Council (KAAC) neih turah an party tan a campaign dawn a ni. Chief Minister pawh hian tuilian avangin harsatna a tawk a, Janata Bhavan-a office panna kawng chu tuiin a chim pil a ni. State sorkar chuan Nilaini khan thuchhuah siamin, tui lenna hmuna school zawng zawngte chu khar turin a ti a ni. Guwahati-ah hian Anil Nagar, Tarun Nagar, VIP Road, Rajgarh, Bhetapara, Jorabat, R G Baruah Road area leh GS Road-te chu tuilian hian a chim avangin nunphung a buai phah hle.

Assam-a tuilian vang Brahmaputra lui kama cheng ten harsatna hi an tawk nasa zual a ni. Brahmaputra bakah hian lui pali - Hailakandi leh Kushiyara Barak leh Katakhal-te pawh an lian a, hei hian harsatna thleng hi a belhchhah hle a ni. Assam State Disaster Management Authority (ASDMA) chuan harsatna tawk hi mi nuai chuang fe an nih tawh thu an sawi a, khaw 200 dawn chu tuilian hian a chim tawh tih an tarlang. Thlai chinna hmun ram hectare 500 vel zet chu a chim pil tawh bawk. Hmun eng emaw zatah relief camp siam a ni tawh a, relief distribution point 100 chuang siam a ni tawh bawk.

Indian Air Force-te chuan a ṭul huna che chhuak nghal thei turin an inralring tih an lo sawi tawh a, Eastern Air Command (EAC) Air Officer Commanding-in-Chief Air Marshal Anil Khosla chuan, Assam-a tuilian tuarte chhawmdawl hna thawk tur hian aircraft eng emaw zat chu inralrin tir an nih thu a sawi. Air Force station-te pawh inralring tura hriattir an nih thu sawiin, chhanchhuah hna thawk turin an inpeih tih a sawi. Navy, Army leh paramilitary force-te pawh inring tura hriattir an ni.

Northeast Frontier Railway (NFR) offical-te chuan tuilian leh leimin avangin hmun hrang hrangah rel tlan dan tihdanglam a nih thu an lo sawi tawh bawk a, rel service eng emaw zat chu tih tawp lailawk a ni. Hei hian eng chen nge a awh dawn hriat a ni lo. Hetih lai hian lawng hmanga inkalpawhna ṭhenkhat pawh tihtawp lailawk an lo ni tawh a, lui kama chengte chu fimkhur tura chah an ni. Tuilian tuarte ṭanpui hna hi army leh State Disaster Rescue Force (SDRF)-te'n an thawk a, eitur tlakchham avanga thi an awm loh nan leh, hrileng a awm lohna turin hma lak a ni bawk.

Hetih lai hian Manipur pawhin tuilian avang hian harsatna hrang hrang a tawk mek a, lui tam tak chu mihring tana hlauhawm khawpin an lian tawh a ni. Manipur Irrigation and Flood Control Department Minister Letpao Haokip leh Department official-te chuan tui lenna hmun hrang hrangte an tlawh a, a hmunah kalin ṭanpui hna thawh dan tur an en. Tuilian hi valley area-a chengten an tuar nasa a, chhungkaw eng emaw zatin himna zawngin an in leh lo an chhuahsan tawh a ni. State sorkar chuan mipuiten ei leh barah harsatna an tawh loh nan theih ang angin hma an la a, mahni chenna-in chhuahsan te awmna tur pawh a ngaihtuah sak a ni.

Offical-te chuan Imphal River leh Nambul River-te chuan hlauhawm chhinchiahna a chim ṭan tawh tih an sawi a, hmun hrang hrangah inkalpawhna lei a chim tawh tih an sawi. IFCD Minister Letpao Haokip, MLA Sekmai, Parliamentary Secretary (RD&PR) H. Dingo Singh bakah Additional Chief Engineer (IFCD) Ksh Pritam Singh -te chuan relief camp hrang hrang an tlawh a, hma lak zel dan tur an enho a ni. Team-te hian Kangpokpi district -a relief camp pawh tlawhin ṭanpuin sum an pe a, harsatna tawk mekte an thlamuan a ni. Chief Engineer (IFCD) control room chu mamawhtute tan chhun zan zawma hawn a ni a, a ṭul huna che chhuak thei turin an inralring a ni.

Assam, Mizoram leh Manipur tih loh hmarchhak state dangah harsatna thleng lian tham report a awm lo thung.