Tripura sorkarin pay scale tihsan remti
Tripura sorkar chuan state sorkar hnuaia thawk mi nuai 2.45-te hlawh tihpun a remtih thu Thawhlehni khan a puang.
Hei hian pay scale leh allowance a huam dawn a, sorkar hna thawk lai leh pension tawh te a huam dawn a ni. Hlawh tihsanna hi 19.68% a ni a, sorkar laipuiin central government employee-te hlawh 14.2%-a tihsan sak aiin a sang zawk a ni. Finance Minister Bhanulal Saha chuan hlawh tihpun hi cabinet meeting-ah sawiho a nih hnuah pass a nih thu sawiin, April 1 aṭanga hman ṭan tur anga chhut a ni. Hlawh tihsan a nih avang hian state sorkar chuan kum khat chhungin cheng vaibelchhe 1,282 a sen belh dawn a, sorkar hnathawk hlawh atan hian state budget pumpui aṭanga 42% a hman a ngai dawn bawk a ni.
Principal Secretary (Finance) M. Nagaraju chuan pay-scale hniam ber 6,240 ni ṭhin chu, 14,040-ah a kai chho tawh dawn tih sawiin, house rent leh thil danga allowance pek ṭhin pawh tihpun a ni, a ti. State sorkar chuan pay zirchiang tur hian April thla khan committee a lo din tawh a, report hi sorkar-ah thehluh a nih hnuin cabinet chuan a pawm ta a ni. Committee hi Chief Secretary hlui G.K. Rao chuan a ho a, ni 56 chhungin report hi sorkarah an thehlut a ni. Thawhlehni-a cabinet meeting hi Chief Minister Manik Sarkar chuan a kaihhruai a ni.