NSCN-K chief SS Khaplang-a thihnain inremna kawng a hawng dawn em?

Naga hel pawl - National Socialist Council of Nagaland - Khaplang (NSCN-K) chief SS Khaplang chu tunhnai khan hun rei tak enkawl a nih hnuin Myanmar-ah a boral a, kum 77 mi a ni. Hetih lai hian SS Khaplanga thihna hian Naga hel-te nena inremna zawnga inbiakna neih mekah kawng a hawn an rin thu mi ṭhenkhat chuan an sawi.

Khaplang hi Naga-te inlakhran tumna kawngah a sulsutu ber zinga mi a ni a, mi thiltithei tak a ni. NSCN-K hotu a nih bakah hian, United Liberation Front of Western South East Asia (UNLFW)-ah pawh mi ṭangkai tak lo ni tawh ṭhin a ni. Khaplang hian inremna zawnga sorkar laipui nen inbiakna neih a dodal a, inbiakna hmanga inremna siam thlawp lotu a ni. Amah hi Myanmar-a Hemi Naga a ni a, India hmarchhak leh Myanmar-a Naga-te rorelna hmun khata an awm theih nana hma latu a ni. A kaihhruaina hnuiah Naga helte hian hmarchhak hmun hrang hrangah pawikhawihna an thlen fo a, Guwahati-a Centre for Development and Peace Studies-a Executive director Wasbir Hussain chuan Khaplang hi kum eng emaw zat chhunga pawikhawihna thleng langsar tak takah khan a hnarkaitu ber te zinga mi niin a sawi.

Tunhnai khan Union Minister of State for Home Kiren Rijiju chuan NSCN-K chief thihna chu inremna kawng zawnga inbiaknaah thil pawimawh tak a ni thei dawn tih a sawi a, a kaihhruai NSCN-K chu sorkar kuta inpe turin a ngen a ni. Rijiju chuan, “Khaplang hi NSCN-K-a mi pawimawh tak a ni a, hmar­chhaka pawikhawina thlengah ṭhinah mawhphurtute zinga mi a ni. Amah hi Myanmar ram khua leh tui a ni a, a thihna hian ngahawng lian tak a nei dawn a ni" a ti. Sorkar laipui chuan Naga helte chu inpe turin a duh reng tih a sawi a, an hamṭhatna tur kawng hrang hrang pawh ngaihtuah sak a tiam tih a sawi. Naga hel zinga India khua leh tui nihna neite chu sorkar kuta inpe tura ngenin, inlakhran duhna rilru paih bo tawh turin a ngen a ni. Hetih rual hian Naga hel zinga Myanmar khua leh tui nihna nei te chungchangah erawh a sawi lang lo.

Wasbir Hussain chuan, Khaplanga thih chungchangah hian zawhna tam tak a awm tih sawiin, a kalsan tak NSCN-K mi leh sa te hi rilru lamletin sorkarah an inpe dawn nge, an hruaitu Khaplanga duhna tihlawhtling turin na zawkin an che dawn tih chu chhan harsa tak a ni,a ti. Hetih rual hian India ramah pawikhawihna nasa zawk an thlen mai a hlauhawm niin a sawi a, UNLFW-te pawh a cho phur pha thei a ni, a ti. United Liberation Front of Assam (ULFA) hotu Paresh Baruah chu Khaplanga ṭhian hnaivai tak a nih avangin, ULFA-te hi na zawka an chet a hlauhawm niin a sawi bawk.

Hetih mek lai hian Naga helpawl dang - National Socialist Council of Nagaland - Isak-Muivah (NSCN-IM) chuan thuchhuah siamin, NSCN-K chief Khaplang hian politics-ah ngaihdan dik lo a nei niin an tarlang. NSCN-IM general secretary Thuingaleng Muivah chuan, Khaplang-a'n politics a kalpui dan hi a dik tawk lo a, tharum thawhna hmangin hnehna chan a tum a ni, a ti. Mahse a thil tihsual tam tak hi ngaihdam a ni tawh, a ti. National Socialist Council of Nagaland - Isak-Muivah (NSCN-IM) lam chuan National Socialist Council of Nagaland - Khaplang (NSCN-K) chief Khaplang hi tharum hmanga zalenna sualah an ngai a ni.

S.S. Khaplang hi kar kalta Zirtawpni khan Myanmar-ah kum 77 mi niin a boral a ni.