Chakma zirlai pawlin AAPSU bandh huaihawt thlawp lo turin ngen

Arunachal Pradesh Chakma Students Union (APCSU) chuan All Arunachal Pradesh Students Union (AAPSU)-in Chakma leh Hajong hnam hnena residence permit pek chhuah tihtawp phut a, August 3 aṭanga state puma nawrh huaihawt an tum chu thlawp lo turin Arunachal Pradesh mipuite an ngen.

AAPSU hian Chakma leh Hajong hnena residential proof certificate (RCP) pek chu tihtawp tur leh, permit pek chhuah chungchanga inhnamhnawiha an puh EAC office-a thawk, Robin Chakma chu man an phut a ni. Diyun administrative division aṭangin RCP hi Chakma leh Hajong mi 500 chuang hnenah pek a ni tawh niin an sawi. Hei bakah hian National Security Act hnuaiah Changlang district deputy commissioner leh Diyun-a extra-assistant commissioner chu thubuai siamsak an phut bawk. Chakma-te thlavang hauhtu Biri Joy chu man turin an phut bawk a, an thil phut hi sorkarin a tihhlawhtlin loh chuan August 3 aṭangin bandh huaihawt hi an tum a ni.

Chakma zirlai pawl hruaitu, Rup Singh Chakma chuan AAPSU thil phut hi thil awmze nei lo a nih thu sawiin, India ram dan ang thlapin Chakma-te hnenah hian residence certificate hi pek a ni, a ti. State sorkar pawhin AAPSU thil phut chu tihlawhtling lo tura ngenin, tihhlawhtlin a nih chuan dan anga rorel ni loin, mob rule angin an kal tihna a ni dawn tih a sawi. AAPSU-in Rohin Chakma an puhna pawh thu dik lo niin an sawi bawk.