Explosives Act hnuaiah Meghalaya BJP hruaitu thubuai siamsak

Meghalaya BJP vice president Bernard Marak chu a farmhouse-a nawrhchizawrhna hmun siama puha man a nih hnuah, Explosives Act hnuaiah thubuai dang siamsak a ni leh.

Meghalaya police-ten July 22 zana Tura-a Marak-a farmhouse an dapsak hnuah, amah hi Guwahati lamah a tlanchhia a, a hnuah Delhi lamah a kal leh nia sawi a ni. Meghalaya police-ten notice an tihchhuah hnuah, Thawhlehni khan Hapur, Uttar Pradesh-ah Hapur police leh Special Operation Group (SOG)-ten an man a, Tura lamah hruai chhoh nghal a ni.

Ningani khan District Child Protection Unit leh Meghalaya Police-te chuan Barak-a farmhouse, Rimpu Bagan hi tlawhin he hmun aṭanga naupang chhanchhuahte thawmhnaw leh lehkhabute an la. An enfiahnaah, room pakhatah puak thei lam thil eng emaw an hmuh belh a, an thil hmuh zingah hian gelatin tlawn 35, detonator 100, thal pali leh thal fang 15 an hmu tel. Hengte hi lain, court-ah hlan a ni dawn tih police-te chuan an sawi a, hei vang hian Explosives Substances Act, 1908 hnuaiha thubuai hi siam belh leh a ni tih an sawi bawk.

Farmhouse-ah hian room 30 a awm a, police-ten an dap laia awm mi 78-te chu man vek an ni a, an zingah hian hmeichhia 23 bakah kum tling lo panga an tel.

West Garo Hills thuneitute chuan BJP vice president man a ni leh, a farmhouse-a thil thleng chungchang chhui chiang turin magisterial inquiry a din tawh bawk.

Marak hi helpawl ṭhiah tawh, ANVC(B) chairman a ni ṭhin a, an pawl hi ṭhiah a nih hnuah BJP zawmin,Garo Hills Autonomous District Council member a ni. Kum 2000 vel aṭang khan thubuai, criminal case 25 chuang a nei tawh a ni.

Farmhouse aṭanga naupang chhanchhuah zinga pakhat chuan mipat hmeichhiat lam hawia khawih a nih thu a sawi niin West Garo Hills district police hotu Vivekanand Singh chuan a sawi. He naupang hi medical examination neihsak a nih hnuah Marak lakah hian Protection of Children from Sexual Offences (POCSO) hnuaiah thubuai pawh siamsak a ni nghal bawk.