Assam police-te'n an ruihhlo man Rs vbc 100 hu halral

Assam police-te chuan Inrinni liam ta khan an ruihhlo man khawm, Rs vbch 100 chuang hu tichhiaiin an hal ral.

Police commissioner Harmeet Singh chuan Guawahati khaw dai, Hatishila Daampara-a ruihhlo an tihchhiat leh halral zingah heroin, cannabis leh raw methamphetamine bakah, meth tablet 19,00,000 leh khuh damdawi bur 3,70,000 a tel tih a sawi. An ruihhlo halral hi kg 935 zet a tling.

Assam chief minister Himanta Biswa Sarma chuan ruihhlo do beihpui thlak tur hian thupek a lo tichhuak tawh a, CM thupek ang hian theihtawpin hma an la zel dawn tih Singh chuan a sawi. Ruihhlo-a sumdawnnaa inhnamhnawih chu eng mi pawh ni se zuah an ni dawn lo a, an lakah action na tak lak a ni zel ang, a ti.

Inrinnia Drugs Disposal programme hman hnuaiah hian Dhubri, Karbi Anglong leh Karimganj district-ah pawh ruihhlo eng emaw zat hal ral a ni bawk.

Dubri-ah hian contraband tablet 1,404, khuh damdawi bur 4,901, cannabis kg 1.50 leh brown sugar gram 580 an hal a, a hlut zawng hi Rs vbc 1.5 chuang a ni. Karbi Anglong-ah heroin kg 3.48, cannabis kg 32, cotraband tablet 2,101 leh khuh damdawi bur 26 hal a ni bawk a, Rs vbc 2.72 man hu a ni. Karimganj-ah cannabis kg 5.185, Yaba tablet 5,95,366, heroin kg 3.653 leh khuh damdawi bur 76,103 an hal a, ruihhlo tihchhiat hi Rs vbc 68 man a ni.