Delhi Police-te'n hmarchhak mite pualin short film tichhuak

Delhi police-te'n an hmalakna thar, hmarchhak mite enhranna tihtawpna tur an kalpuina atana short film an siam chu tihchhuah a ni.

Minute 15 awh, short film hi kar liam ta khan DD Assam-ah tihchhuah a ni a, Delhi Police YouTube channel leh social media platform dangah pawh dah a ni ang.

He film script hi Tripura mi, Delhi-based journalist Madhumita Chakraborty ziah a ni a, hmarchhak biala hriat hlawh tak takte inlanin, Delhi Police-ten hmarchhak mite tana hma an lakna hrang hrangte an sawilang a ni. Film-a inlan zingah hian Olympian Mary Kom, Mirabai Chanu leh Lovlina Borgohain-te pawh an tel.

"Hmarchhak biala miten Olympics leh intihsiakna pawimawh dangah lawmmante an lak chuan ram pum huapin an lawmpui em em ṭhin. Hetih lai hian mi ṭhenkhat, thil hre chiang tawk loten hmarchhak mite chungchang ṭawngkam mawi lo tak taka sawiin- chinky, momo, Nepali, Bahadur, Corona tihtein an sawi a ni," tiin an tarlang. Hmarchhak state-te bakah Ladakh leh Darjeeling aṭanga metropolitan city-a zirna avanga leh hnathawhna avanga awmte chu ṭawngkam mawi lo taka sawi an ni fo a, enhran an tawk fo a, hei hian ram pum inpumkhatna tur thlengin a nghawng ṭhin a ni, tiin film-ah hian tarlan a ni.

Joint Commissioner of Police (Security) Hibu Tamang chuan Delhi Police-ten hmarchhak mite tana an hmalakna chu midangte pawhin an hriatchian an duh tih sawiin, Delhi-a hmarchhak mi awmte pui tur hian Special Police Unit for North-Eastern Region (SPUNER) pawh siam a ni a, chhun zanin an thawk tih a sawi. Delhi police-ah hian hmarchhak state pariat aṭangin mi 1,100 vel an awm mek bawk.

Delhi Police-te hian hmarchhak mite pualin helpline number 1093 an siam bawk a, he number-ah hian kut inthlak, tualthah, acccident, hlawh pek duh loh, inluah man leh diriam tawh chungchangah ni khatah call vawi nga tal an dawng ṭhin a ni.