Tripura-in Bangladesh-a thingpui thawnchhuah dan ngaihtuah

Tripura chief minister Manik Saha chuan ṭhenawm ram, Bangladesh-ah an state-a thingpui tharchhuah thawnchhuah an tum a, buaipui mek a ni tih a sawi.

Ram pawn lama thingpui thawnchhuah an tum bakah, agency dangte thawhpuiin an state-ah 'tea auction centre' din tum mek a ni, a ti bawk. Domestic market-ah Tripura thingpui hi a lar chho chak hle a, fair-price shop-ahte man tlawm zawka lei theih tur pawhin an siam tawh a ni.

Inrinni liam taa Tripura Tea Development Corporation brand, Tripureswari Premium tea launching programme a hmanpuinaah CM chuan he thu hi a sawi a ni. "State sorkar chuan thingpui quality ṭha zawk leh, national market-ah pawh midangte el phak tur siam a nih theih nan kawng hrang hrangin hma a la a ni," tiin thingpui chingtuten ram chungchanga buaina an neihte pawh hun rei loteah chinfel tum a nih thu a sawi.

CM chuan Tripura-ah hian thingpui hi ram hectare 12,000 chuangah chin niin, tea garden 54 a awm a, heng aṭang hian kum tin thingpui hi kg nuai 9-10 tharchhuah a ni tih a sawi. Hei bakah hian small tea grower hi 2,800 vel awmin, an ni hian green tea hi kg mtd 8-9 vel an tharchhuak bawk a ni, a ti.