Hmarchhak state-a tuilian tuarte sorkar laipuiin ṭanpuina pe dawn

Sorkar laipui chuan hmar­chhak state hrang hranga tuilian tuarte chu ṭanpuina pek an nih tur thu Nilaini khan a puang.

Union Minister of State for Home Kiren Rijiju chuan sorkar laipuiin chhiat tawkte ṭanpuina a pek tur thu hi Twitter-ah a tarlang a, “Ministry of Home Affairs (HMA) chuan Arunachal Pradesh, Mizoram leh hmarchhak state-a tuilianin a tihchhiat leh harsatna thlengte zirchiang tur team a tir dawn a, a ṭul dan angin zángnadawmna pek an ni ang" a ti. Rijiju chuan tuilian tuarte ṭanpui hna thawk tur hian Para-Military Forces, Army, Border Road Organisation (BRO) leh National Disaster Response Force (NDRF) team-te chu tirh an ni dawn tih a sawi. Ṭanpuina hna thawh a nih chhung hian Ministry of Home Affairs (MHA) control room chu chhun zan zawmin hawn a ni dawn tih sawiin, thil awm dan chu thlithai reng a ni, a ti.

Union Minister Rijiju chuan hmarchhak state-te'n tuilian avanga chhiatna hrang hrang an tawh mek chu vanduaithlak a tih thu a sawi rualin, thinlung takin a tawrhpui tih a sawi. Harsatna tawkte ṭanpui hna hi theih ang angin kalpui a ni a, chhiatna nasa zawk a thlen lohna turin hma lak a ni, a ti. Hetih rual hian mipuite chu chiai lo tura a duh thu sawiin, harsatna tawkte chu chhawmdawlna pek an ni zel ang, a ti bawk.

Hetih lai hian Assam-ah chuan tuilian hian ziaawm lam a la pan thei meuh lo a, Nilaini thleng khan mi panga-in an thih phah tawh. Thawhlehni khan zirlai pahnih leh midang pakhatin nunna an lo chan tawh a, zirlaite hi tui lianin electric ban a tihtluk avanga current-in a man hlumte an nih vangin he thil thleng hi chhui chian a nih tur thu state sorkar chuan a puang tawh. Zirlaite hi Maria Public School-a pawl kua zirlai an ni a, a chhui chiangtu tur inquiry committee din a nih tur thu puan a ni. Dibrugarh-a tui lianin a len bo Pintu Das chu Nilaini khan a ruang hmuh a ni tawh bawk.

Assam khawpui Guwahati bakah, district dang eng emaw zat chu tuilian hian a la tibuai hle a, mi tam tak chu hmun him lamah sawn chhuah an ni. Hmun tam taka lirthei che vel a buai phah a, khaw tam tak chu tlawhpawh theih lohin an awm mek. Chief Minister Sarbananda Sonowal chuan chhiatna tawkte chu a tawrhpui thu sawiin, nunna chan chhungte chu zángnadawmna pek an nih tur thu a sawi. Chhiatna thleng vang hian Sonowal chuan Karbi Anglong Autonomous Council (KAAC) election neih tura a campaign tur pawh a lo ṭhulh tawh bawk. State sorkar chuan tui lenna hmun hrang hranga school-te chu khar lailawk turin a lo hriattir tawh a, mipuite chu fimkhur turin a chah bawk.

Assam State Disaster Ma­nage­ment Authority (ASDMA) chuan harsatna tawk hi an pun belh zel thu an sawi a, relief camp pawh siam belh zel a ni. Camp-a awmte tan hian eitur leh tui thianghlim sem hna kalpui a ni a, hri leng thei laka mipuite an him theih nan hma lak a ni bawk. Minister leh MLA-te chuan an bial chhunga tui lian tuarte chu a hmunah kalin an harsatna tawh dan te an enpui a ni. Ei tur leh damdawi sem chhuah hna thawh reng a ni bawk. Tun ṭum hi kumina Assam-in tuilian a tawrh vawi khatna ni a, ruah a sur nasa a, eng chen nge harsatna hi an tawh dawn hriat a ni lo. Assam sorkar chuan kum tina tuilian avanga harsatna a tawh ṭhin chingfel turin hma a la a, World Band nen cheng vaibelchhe tam tak hu inremna an siam tawh a ni.

Hetih lai hian Assam Chief Minister Sonowal chuan tuilian avanga ramsa thihna a thlen lohna turin Kaziranga National Park, Golaghat leh Nagaon Park hotute chu hma la turin a lo ngen tawh a ni. Sonowal chuan kum tin tuilian avangin ramsa eng emaw zat an thi ṭhin tih sawiin, a bikin Park chhunga ramsa te an thi nasa ṭhin niin a sawi. Hetiang thil hi a thlen tawh lohna turin Park enkawltute chu chak zawka hma la tura ngenin, tuilian an tawrh chho leh mekah pawh fimkhur turin a chah a ni. Assam CM hian park hrang hrang enkawltute chu hemi chungchangah hian high level meeting alo neihpui tawh a, tuilian avanga ramsa chunga thihna thleng ṭhin venna kawngah chak zawka hmalak dan tur an sawiho a ni.