Manipur Cabinet-in hmeichhe tan court hran din remti

Manipur cabinet chuan hmeichhe chunga hleihlenna pung zel tur venna tur leh, a chhui zui hna chak zawka kalpui a nih theih nan court hran din a remti.

Nilainia cabinet meeting hian “Court of Addl. Sessions Judge (FTC) for Crimes against Women, Manipur” din hi a remti a, hei hian hmeichhia te chunga hleihlenna thleng hrang hrang chhuizui kawngah nasa takin a pui thei dawn tih tarlan a ni. Fast Track Court-ah hian thawktu pakua dah cabinet chuan a remti bawk. Post pakua te chu - Grade-I of MJS (1), Addl. Public Prosecuter cum Addl. Government Advocate (District) (1), PS/Steno-III (1), UDA/Bench (1), LDA (2), Driver (1) leh peon (2)-te a ni. Chief Minister N. Biren Singh chuan court din tur hian hma lak nghal a ni dawn tih sawiin, hun rei loteah peih fel hman tum a ni, a ti.

Cabinet chuan United Naga Council (UNC)-te'n nikuma district duh lohna lantira National Higway an dan chah chhunga tanker leh truck driver lambunna thlenga hliam tuar leh lirthei tihchhiat sakte hnena zángnadawmna pek tur atan Rs. 1,08,41,094 a pawm. Nikum November 1 aṭanga kumin March 29 chhunga UNC-te'n kawngpui an dan avanga buaina thlenga hliam tuarte chu zángnadawmna pek a remti a ni. Chief Minister N. Biren Singh-a'n April thla-a All Manipur Petroleum Products Transporters Association leh All Manipur Bulk LPG Transpor-ters Association-te meeting a neihpui ṭuma zángnadawna pek a lo tiam tawh angin, National High­way-a lambun tawkte chu zángna­dawmna pek an ni dawn bawk.

Heng bakah hian State Agri­culture Department hmalaknain Urea fertilizer Metric Tonne 12,5000 lakluh remtih a ni a, Bramhaputra Valley Fertilizer Corporation Limited(BVFCL) nen thawhhona turin inremna siam a ni ang. Khualzinte hipna turin Imphal-a Hotel te chu tihchangtlun a ni dawn a, Tourism Infrastructure leh facility-te chu chei ṭhat a, tihhmasawn te a tel. New Delhi, Kolkata leh Guwahati-a Manipur Bhawan luah man ennawn remtih a ni bawk a, room luah man chu 30-70%-a tihhniam remtih a ni. Manipur Panchayati Raj Act, 1994 hnuaiah Panchayat Elections buatsaih cabinet chuan a remti bawk a ni.

Cabinet meeting chuan Manipur State Journalists Welfare Scheme ennawn te, journalist leh an chhungte tana hamṭhatna tam zawk ngaihtuah sak te a remti. Journalist zinga nunna chan an awmin, zángnadawmna cheng nuai hnih pek a remti a, vanduaina tawh vanga ramtuileiloa awmte hnenah chhawmdawlna pek a remti bawk. Heng bakah hian natna khirh - cancer leh a dangte avanga enkawl ngaite chu cheng nuai khat thleng pek a remti bawk.