Hmarchhak state 3-a BJP-te'n sorkar laipui thutlukna duh lo

Hmarchhak-a Kristian tamna state pathum - Nagaland, Mizoram leh Meghalaya-a Bharatiya Janata Party (BJP)-te chuan sorkar laipuiin talh atana bawng zawrh leh lei khapna thupek a chhuah chu an duh loh thu leh, sut leh tura an phut thu an sawi.

Heng state pathum-a BJP-te chuan thuchhuah siamin, sorkar laipuiin bawng talh khapna a tihchhuah chu an thlawp loh thu leh, a tawp thlenga an dodal tur thu a sawi. He khapna dan hi engti kawng zawng mahin pawm theih a ni lo tih sawiin, sakhuana leh culture thlenga nghawng thei a ni, an ti. Sakhaw hrang hrang zuitute tan chuan he khapna hi sakhaw zalenna inrahbehsak tumna a ni a, hnam hrang hrangte tihdan leh kalphung zah lohna an ni, an ti bawk.

Nagaland-a rorel lai Naga People’s Front (NPF) chuan Thawhlehni khan Narendra Modi-a hnenah memorundum an thehlut a, bawng talh khapna chu an state-ah hman a nih ve loh tur thu an sawi. NPF Cen­tral Executive Council chuan Nagland chief minister Shurho­zelie Liezietsu-a kaihhruai sorkar chu nasa zawka sorkar laipui nawr turin an ngen. NPF Resolution Committee Convener Sebastian Zumvu chuan sorkar laipui thutlukna sut leh a nih theih nan hma an lak zel tur thu a sawi. Member 60 awmna Nagaland assembly-a BJP MLA pali-te pawhin NPF-te hmalakna hi an thlawp thu an sawi bawk.

Hmarchak state zingah Megha­laya chu sorkar laipui thu­pek dodalna lantir nasa ber an ni a, BJP, National People’s Party (NPP) leh United Democratic Party (UDP)-te chuan vawi eng emaw zat lungawi lohna an lantir tawh a ni. Hemi chungchang hi Assembly-ah pawh Thawhṭanni khan sawiho a ni a, member-te chuan Prevention of Cruelty to Animals (Regulation of Livestock Markets) Rules, 2017 sut leh a nih theih nan resolution siamin, lungrual takin an pass a ni. Lok Sabha MP Conrad K. Sangma chuan khapna dan hi an state-ah kalpui a nih ve loh tur thu Prime Minister Narendra Modi a hrilh dawn tih a sawi a, Ministry of Environment-ah a zualko dawn tih a sawi bawk. Meghalaya, Garo Hills region-a BJP worker 5,000 vel chuan dodalna hi nasa takin an lantir a ni.

BJP kaihhruaina hnuaia din, hmarchhak-a National leh regional Political party hrang hrangte inzawm khawmna North East Democratic Alliance pawhin Prevention of Cruelty to Animal (Regulation of Livestock Markets) Rules 2017 tlawhchhana sorkar laipuiin khapna thupek a tihchhuah chu an thlawp lo tih an sawi. Dodaltu hrang hrangte chuan he khapna hi ram danpui Article 19(1)(g) bawhchhiatna a nih thu an sawi a, mihringte dikna chanvo rahbeh sak tumna a ni, an ti.