Manipur CM-in Mipuite chhanna tur App tlangzarh

Manipur Chief Mi­nister N. Biren Singh chuan mipuiten sorkara zawhna hrang hrang an neihte chhanna turin application thar ‘Redmine App’ chu a tlangzarh.

Chief Minister Biren Singh chuan hei hi mipuiten awlsam zawka sorkar an dawr theih nana ruahmanna tho a nih thu sawiin, he app hmang hian mipuite zawhna chu SMS hmanga chhan ṭhin a ni ang, a ti. Manipur sorkar hian tun hnai khan mipuiten awlsam zawka sorkar an dawr theihna ni buatsaih a, thla khata ni 15-na zelah hetiang ni hi hman chhoh tum a ni. Chief Minister Secretariat-a Meeyamgi Numit 'People’s Day' hman hi mipuiten an hlut hle a, pawl leh mimal tam takin an dawr a ni. Henga zawhna lut te hi sorkar chuan ‘Redmine App’ kaltlang hian a chhang ṭhin dawn a ni. Hei hi langtlang sorkar a awm theih nan leh, mipuiten awlsam zawka sorkar mi pawimawhte an dawr theih nan buatsaih a ni a, minister leh MLA-te chu a chhawkin an ṭhu ṭhin dawn a ni.

CM Biren Singh chuan May 15-a 'People’s Day' hman a nih khan complaint 115 a lut tih a sawi a, heng zinga 15-te chu chinfel tawh a ni, a ti. Case 25 chhuizui mek a awm tih sawiin, a dang pawh bawhzui nghal zel a ni ang, a ti. Sorkar hmalak zui dan chu Chief Minister Secretariat-ah kalin a bawhzui theih tih a sawi bawk.