Hmarchhak harsatna tawh chinfelna awm chhun chu democracy a ni : Manipur Governor

Manipur Governor Najma Heptulla chuan hmarchhakin harsatna a tawh hrang hrangte chu democracy hmang chauha chinfel theih a nih thu a sawi.

He thu hi ni hnih awh North East Region Commonwealth Parliamentary Asso­ciation Conference (NERCPAC 2017) a hmanpuinaah a sawi a ni.

NERCPAC 2017 hi June 15 khan Lok Sabha Speaker Sumitra Mahajan chuan a hawng a, kar kalta Zirtawpni khan zawhfel a ni. Manipur Governor chuan, hmarchhak chu India ram laili te nen ram leilungah a inhlat hle a, hei hian kawng tam takah harsatna a thlen a ni. Chu chuan rilru leh ngaihtuahnaah nghawng a nei a, inenhranna leh inthleibikna a thlen ta ni. Hei hi khawvelin a ken tel a ni a, amah­erawhchu hei hi zawi zawiin a reh chho mek zel a ni, a ti. Democracy chu ram mipuite inkara inunauna thlentu, hnam leh chibil inkara remna siamtu leh kawng engkima ram mipuite intluk tlanga min siamtu a ni a, hei chauh hi hmarchhakin ram laili zawkte nena inkungkaihna ṭha neih theihna tur awm chhun a ni, a ti.

Governor Najma Heptulla chuan hmar­chhakin nasa takin hma a sawn tih sawiin, India ram khawpui hrang hrang aṭangin thlawhtheihna hmangin hmarchhak state-te chu kal pawh zung zung theih a ni tawh a, chu chuan inunauna ṭha pawh a thlen belh zel a ni. Hei hi tourism industry tan pawha thil ṭangkai tak a ni a, hmasawn deuh deuh tura hma lak zel a ni ang, a ti. Hmarchhak chuan inkalpawhna, a bikin kawngpui ṭha leh rel kawng ṭha a mamawh tih sawiin, hmarchhak huam chhunga infrastructure

ṭha leh changtlung din tura thil pawimawh tak a nih thu a sawi. Thuneitute chu hmun chengker leh, tlawh pawh harsa zawka awmten an mamawh huna doctor an rawn ve theih nan ‘flying doctor’ team din turin a ngen a, North Eastern Council (NEC) pawh hemi kawngah hian chak zawka hma la tura a duh thu a sawi.

NERCPAC 2017 vawi 16 naah hian kal khawmte chuan agenda thlan bik - ‘Special Plan for development of Railways, Airways, Surface Road and Inland Waterways connectivity for speedy economic development of North East Region’ tih hmangin sawihona hun an hmang. He hun hi Manipur sorkar buat­saih a ni a, hmar­chhak state hrang aiawhte an tel ṭha hle.

Tripura Legislative Assembly Deputy Spea­ker Pabitra Kar chuan, "India-in zalen­na a hmuh hnu kum tam takah pawh hmarchhak state-te'n inkalpawhna ṭha kan la nei lo a, a nihna dik takah chuan hmarchhak huam chhunga district zawng zawng hi chu National Highway Four Lane-a kal pawh theiha siam vek tawh tur a ni. Khawpui tin te chu relin a tlawh pawh vek tawh tur a ni a, district tin a thleng phak bawk tur a ni" a ti. Mizoram Legislative Assembly speaker Hiphei chuan, "Hmarchakin kawng hrang hranga hma a sawn theihna turin sorkar laipui chuan special plan a duang tur a ni" a ti.

Arunachal Pradesh Legislative Assem­bly speaker Tenzing Norbu Thongdok chuan, "Sum indaih lohna chauh chu hmar­chhakin harsatna a tawh a ni lo a, central aṭanga project siam tih­khaw­tlai a ni ṭhin hi a pawi lai ber chu a ni" a ti. Mani­pur Legislative Assembly member P. Sarathchandra Singh chuan, "Hmarchhakin hmasawnna nasa zawk a neih theih nan South East Asia nena inthlunzawmna ṭha nei turin sorkar laipuiin hma la rawh se" a ti.

Nagaland Legislative Assembly speaker Dr. Imtiwapang Aier pawhin, "Hmarchhakin hma a sawn theihna turin special plan duan a ngai a, sum leh paiah pawh special statua pek a ngai a ni" a ti. Assam Legislative Assembly speaker Hitendra Nath Goswami pawhin hmasawnna tur atana a ngaih pawimawh hrang hrangte a sawi ve bawk.

He conference-ah hian Arunachal Pradesh Legislative Assembly Tenzing Norbu Thongdok rawtna angin ‘Parlia­mentary Procedure for the New Millennium’ tih thupui hmangin sawihona hun hman a ni. Hei bakah hian agenda-a tel ‘North East and Look East Policy’ chungchang sawiho a ni a, Act East Policy kalpui mek sawiho a ni bawk.