NSCN-IM-te'n civil mi an thah vangin Manpur-ah buaina chhuak

Naga hel National Socialist Council of Nagaland - Isak-Muivah (NSCN-IM)-te chuan kar kalta Zirtawpni khan Manipur-ah civil mi pahnih an that a, he thil thlen hnua buaina chhuakah mi eng emaw zatin hliam an tuar bawk.

(NSCN-IM)-te'n an thah hi Romeo Shally (28) leh Chingripam Lungleng (25)-te an ni a, Ukhrul district-a cheng an ni. NSCN-IM-te hian civil mi pahnihte hi an hren hnuah nasa takin an sawisa a, an thih phah ta a ni. Shally hi helte chuan pawngsualtuah puhin June 14 khan an man a, nasa takin an sawisa zui a ni. Hetihlai hian civil mite chuan Sally-a'n hmeichhia a pawngsual nia an sawi hi, Shally-a laina hnai tak niin an sawi a, pawngsuala puhna hi finfiah a nih loh thu an sawi. Shally hi NSCN hmunpui Phungreitang-a Wung Tangkhul Region (WTR)-ah hren a ni a, June 15 khan mipui lungawi lo mi 500 vel zet an pungkhawm a ni. Mipuite hian Shally hi hruai chhuah an tum a, Shally-a farnu chuan a u hi hmuh a dil bawk. Hei hi NSCN-IM-te hian an remtihsak loh avangin mipui lungawi lote chuan an tawng zui a, buaina hi a chhuak ta a ni.

He thil thlenna hmunah hian silai pawh hmehpuah a ni a, mi eng emaw zatin hliam an tuar. Civil mi Chingripam Lungleng chu a awmah silaia kah a ni a, hospital panpui a nih hnuah a boral zui a ni.