Meghalaya-ah rel kawng sial duh lohna lantir

Meghalaya-a pawl hrang hrangte chuan kar kalta Zir­tawpni khan Ri Bhoi district-a Tetelia-Byrnihat railway project kalpui duh lohna lantirin nawrh an huaihawt.

Pawl pathum - Federation of Khasi-Jaintia & Garo Peo­ple (FKJGP), Hynniewtrep National Youth Front leh Ri Bhoi Youth Federation chuan lungawi lohna hi an lantir a, Khasi Jaintia Hills region-a rel kawng sial chu dan loa hnam dang mite lo luhna tur hmanrua a nih avangin an remti lo tih an sawi. Federation of Khasi-Jaintia & Garo People (FKJGP) president Wellbirth Rani chuan June 21 hian nawrh hi an huaihawt leh dawn tih sawiin, project hi tihtawp a nih hma loh chuan hma an la zel dawn tih a sawi. He railway project hi Meghalaya mipuite chimral theihna a nih avangin an do zel dawn tih an sawi a, Inner Line Permit (ILP) chu khauh zawka ken kawh an phut thu an sawi.

FKJGP president chuan nawrh hi Additional Secre­tariat kawtah an lantir dawn tih sawiin, an thil phut tihlawhtlin thuai a nih theih nan state sorkar chu hma la turin an phut tih a sawi. Nawrh huaihawtna hmun Ri-Bhoi leh East Khasi Hills district-ah chuan mi 10 vel man an ni. Hemi chung­changah hian FKJGP, HNYF leh RBYF-te chuan thla hmasa khan thutlukna an lo siam tawh a ni. Kum 2013 khan pawl hrang hrangte chuan khauh zawka Inner Line Permit (ILP) kenkawh phutin nawrh an lo huaihawt tawh bawk.