AP sorkarin Changlang-a RPC pekchhuah titawp

Arunachal Pradesh sorkar chuan Changlang district-a residential proof certificates (RPC) pek chhuah ṭhin chu titawp vek turin thupek a tichhuak.

Political department-in thupek hi tichhuakin, nimin aṭang khan Changlang district-a RPC pekchhuah mek chu titawp vek tur hian a ti a, a thar pawh siam tawh rih lo turin a ti nghal bawk.

All Arunachal Pradesh Students’ Union (AAPSU) chuan an state-a Chakma leh Hajong hnam hnena RPC pek chhuah ṭhin hi titawp tur leh, an pek tawhte pawh sut leh vek turin sorkar hi an phut a ni. An thil phut nawrna atana August 3 aṭanga tiam chin awm loa nawrh huaihawt an tum erawh an ṭhulh leh a ni. Hei hi state sorkarin RPC chungchanga zirchiang tura member panga awmna committee a din tak vang a ni.

Committee-ah hian food and civil supplies secretary Opak Gao, border affairs director Hage Lailang, home under secretary Likha Sampu bakah AAPSU aiawh member pahnih an tel. Committee hian ni 15 chhungin preliminary report chu sorkarah an thehlut dawn a, ni 45 chhungin report kimchang an pe ang.

AAPSU hian Chakma leh Hajong-te hnenah RPC pechhuaka puhin, Diyun ADC chu suspend turin an phut a, hei bakah he thila inhnamhnawiha Bordumsa-Diyun MLA lakah pawh action la turin an phut bawk.