Meghalaya BJP Vice President thil tih vangin Congress-in BJP President Nadda bang turin phut

Meghalaya BJP vice president Bernard Mara-a'n Tura-a a farmhouse-a nawhchizawrhna hmun a siam nia puh chungchangah, Congress party chuan BJP national president JP Nadda chu bang turin an phut.

Meghalaya police-ten Bernard Marak farmhouse an dapnaah he hmuna lo awm mi 73 an man a, kum tling lo mi paruk, mipa pali leh hmeichhia pahnih an chhanchhuak bawk. A hnuah farmhouse aṭang hian puakthei thil leh hmanraw dangte pawh an man leh bawk a ni.

Marak hi tlanchhiat a tum chu Uttar Pradesh-ah manin, Tura lamah hruai kir a ni. Thubuai pawh siamsak a ni tawh bawk. Hetichung hian BJP hian an party hruaitu chungah hian eng action mah an la lo niin Congresss thupuangtu Ajoy Kumar chuan a sawi.

Ajoy Kumar chuan Unnao pawngsual thubuai avanga man, BJP MLA hlui Kuldeep Singh Senger leh mi pawngsualtua puh, Arunachal Pradesh BJP MLA Goruk Pordung-te chungah pawh BJP chuan action an la lo a ni, a ti. An party hruaitu tam takin pawikhawih a, hmeichhiate chung thlenga pawi an khawih avang hian BJP president JP Nadda leh union home minister Amit Shah-te chu an post aṭangin an bang ngei tur a ni, a ti.