Non-BJP sorkar paihthlakna tura hma laah Assam sorkar puh

Jharkhand Congress hotu Rajesh Thakur chuan Assam-a BJP sorkar chu tun hnaia ram chhung hmun dang danga BJP ni lo, party dang sorkarna state-a sorkar paihthlak tuma hma latu berah a puh.

Rajesh Thakur chuan, "BJP hian non-BJP sorkarte paihthlak dan ngaihtuahin a phiarru reng a, heng phiarruknate hi Assam aṭang hian a lo kal ṭhin a ni," a ti.

Maharashtra-a ṭangrual sorkar paihthlak a, Eknath Shinde kaihhruai Shiv Sena leh BJP thawhdunna sorkar a din dan chungchangah pawh Assam inrawlh dan chu mitinin an hmu vek a ni, tiin tunah Jharkhand-a Congress sorkar paihthlak tumin an phiar leh mek a, an thil tum hi reiloteah a rawn lang chiang dawn a ni, tiin Thakur chuan a sawi. Maharashtra-a ṭangrual sorkar-a tel, Shiv Sena MLA hel eng emaw zat kha Assam-ah hian an inkhuar a, Assam sorkar pawhin venhimna a lo pe vek a ni.

Jharkhand-a Congress party MLP pathum, Howrah-a pawisa fai tam tham tak nena Inrinnia Bengal police-ten an man takte khan Jharkhand sorkar paihthlak dan sawipui tura Assam chief minister Himanta Biswa Sarma hmu turin an hrilh niin Congress MLA dang pakhat chuan a sawi.

Pathianni khan Congress MLA pathumte kut aṭanga pawisa tam tham tak man anih chungchangah, Jharkhand Congress MLA Kumar Jaimangal Singh chuan Assam Chief Minister lakah complaint a thehlut a ni. Singh chuan Jharkhand-a JMM-Congress sorkar an paihthlak theih chuan, sum tam tham tak bakah BJP sorkar a din hunah minister dinhmun pek an tiam tih a sawi a ni. Heng MLA pathumte hian sorkar paithlakna tura hma lakna hi Sarma hian Delhi-a BJP hruaitu lute pawmpuinain a ti niin an sawi tih a tarlang bawk.

Hetih lai hian Assam CM Sarma chuan an puhna hi thu dik lo niin a sawi a, hemi chungchanga a laka complaint thehluh a nihna chhan chu a hriatthiam loh thu a sawi thung.