Manipur-a foreign zu khapna hlih a ni dawn : CM

Manipur chief minister N Biren Singh chuan an state-a foreign zu zawrh leh lei khapna dan chu sorkarin a hlip dawn tih Thawhṭanni khan a sawi.

12th Manipur Legislative Assembly session vawi hnihna neih mekah, Chief Minister hian MLA K Ranjit Singh zawhna chhangin, sorkarin foreign zu khapna dan hman mek chu a ngaihtuah ṭhat thu leh, he khapna hi hlih a nih chuan zu chhiah aṭang hian an state chuan kumtin Rs vbc 600-700 a lakluh belh thei dawn tih a sawi a ni.

CM Singh chuan 11th Manipur Legislative Assembly-ah khan Manipur Liquor Prohibition (2nd Amendment) Bill 2018 pharh a ni a, hei hi state chhunga an zu siam chhuahte state pawn lama thawnchhuah tlaka quality ṭha zawka siam a nih theihna tur atana hmalakna a ni, a ti. Bill hi ṭhat tawk lohna laite awm mah se, hma lak zelna turin ngaihtuah ṭhat a ni dawn tih a sawi bawk.

MLA dang, K Ranjit Singh zawhna chhangin Moirang Khunou area-a Sangai Ethnic Heritage Park siam tur pawh state mipuite tam zawk duh dan anga thutlukna hi siam a nih thu Chief Minister chuan House a hrilh. A tirah chuan Park hi Keibl Lamjao-ah siam tum ani a, mahse project committee-in Park siam tumna hmun an tlawh hian a hmunhma hi a zau tawk lo a, structure hrang hrang siamna tur a remchang lo tih an sawi bakah, Manipur-a sakhi chi khat vang tawh tak, Sangai-te khawsakna thlengin a tibuai thei tih an sawi a ni, a ti. Hei vang hian Keibul Lamjao National Park aṭanga hla vak lo, Moirang Khunou area-ah committee rawtna angin Park hi siam tum a ni ta zawk tih a sawi a ni. Park-ah hian hnam hrang hrang pualin in 34, conference hall, parking lot leh thil dangte dah tel a ni ang.