In post duhnaah awm tum kher suh u - AP Home Minister

Arunachal Pradesh home minister Bamang Felix chuan an state-a police officer-te chu an post awm duhna hmuna awm kher tum lo turin a hrilh.

Minister hian Arunachal Pradesh Police (APP) superintendent leh Indian Reserve Battalion (IRBN) commandant-te annual conference hawnna inkhawma thu a sawiah he thu hi a sawi a ni. "Police officer-te chu an state pum chu in hnathawhna bial a ni tih ngaihtuah reng ula, in duhna hmun bika awm tura transfer tur leh in post duhnaa awm tur khan bei suh u. State hmasawnna tur te, dan leh thupek kenkawhna turin kan vai hian mawh kan phur vek a ni," a ti.

Itanagar-a D K Convention Hall-ah 'Building Professionalism through Basic Policing’ tih thupui hmangin SP leh Commandant-te hian Thawhṭanni aṭang khan ni li awh tur conference hi an nei a ni. Deputy SP rank leh midangte pawhin video conferencing hmangin an chhim ve bawk.

An state-a ruihhlo hluar chho mek chungchang pawh sawiin, Minister Felix chuan forensic science laboratory din dan tur pawh buaipui a ni tih a sawi a, hei hi tihfel theih a nih chuan forensic evidence nen ruihhlo tawlhtute chu thubuai siamsak an ni thei ṭhin dawn a ni, a ti. Ram dang mi an state-a lut an pung zel chungchangah pawh state police-te chu entry point zawng zawngah inner line permit (ILP)-te chu uluk taka enfiah sak turin a chah.