Tripura CM hlui hnena venhimna pek mipui sum khawhralnaah puh

Tripura Congress MLA Sudip Roy Barman chuan chief minister hlui Biplab Kumar Deb vengtu tur pek a ni chu mipui sum khawhralna mai mai niin a sawi.

Barman chuan Deb hi tunah chuan MLA fang ve mai a ni tawh a, hei vang hian vengtu tur eng emaw zat lo pek chhunzawm zel a ngai tawh lo a ni, tiin Director General of Police (DGP), Tripura, Amitabha Ranjan hnenah a hrilh.

"Tripura-ah hian kum ruk liam ta chhung khan security pek chungchangah thil mak tak a thleng fo a ni. Kum 2017 khan hetih laia BJP state president, Biplab Kumar Deb hian amah beih tumtu an awm nia sawiin union home ministry-ah security cover a dil a, Y category security pek a lo ni tawh bawk a ni," tiin Barman chuan DGP hnena lehkha a thawnah a sawi a ni.

Barman chuan Deb hi CM aṭanga a ban hnuah, amah leh a personal assistant-te chuan Z plus security dawng tur niin an insawi zui tlat a, hei vang hian state chhung leh pawn lama a kal velnaah pawh security officer-ten an zui zel a ni, a ti. Deb-a venhimna pekna atan hian sorkar motor-te chu dik lo taka hman ṭhin a ni, a ti bawk. Sorkar laipui lamin Y category security a pek hnuah, CM aṭanga a ban hnua Z plus category secuirty pek chu standard protocol kalh a ni tiin a sawi.

Deb-a hnena Z plus security pekna atana state sorkarin sum a sen belhte chu Deb-a hi rulh tir vek turin a phut tih Barman chuan a sawi bawk.