Assam CM-in Majuli tan Mobile App tlangzarh

Assam Chief Minister Sarbananda Sonowal chuan khawvela river island lian ber Majuli tan Android Mobile Appli­cation thar a tlangzarh.

Assam CM Sonowal chuan he application hi information pekna atana duan a nih thu sawiin, Majuli huam chhunga District hrang hranga Satriya culture, Mising culture, Carbon Registry, hotel, transport, lodge leh thil pawimawh hrang hrang atan a ṭangkai hle dawn a ni, a ti. Khawvela river island lian ber hian tlawhtu a ngah chho zel tih sawiin, he application thar pawh hi khualzin te tan a ṭangkai hle dawn a ni, a ti. Majuli hi Sonowal-a bial a ni a, state assembly election hnu­hnung berah khan hneh taka thlen tlin a ni. Majuli hi United Nations Educational, Scientific and Cultural Organization (UNESCO) chuan Worlh Heritage Site-ah kum 2015 khan a lo puang tawh a ni.

Majuli-ah hian Gar­murh-te bultumin Ma­king of Developed India (Modi) fest buatsaih a ni a, Sono­wal hian a hmanpui a ni. Fest-ah hian BJP kaihhruai NDA sorkarin centrala kum thum chhunga hlawhtlinna a chan tawh hrang hrang te leh, hmalakna hrang herangte tarlan a ni. Assam CM chuan, Prime Minister Narendra Modi-a kaihhruai sorkar chuan hmarchhak mi­puite hmasawnna a ngai­pawimawh hle tih sawiin, hmasawnna tur project leh scheme eng emaw zat duan a ni, a ti. Hnamhnuai hnung zawkte tan sorkar laipui chuan ‘Jan Dhan Scheme’ a duang tih sawiin, hei hian hamṭhat­na eng emaw zat a keng tel tih a sawi bawk.

Chief Minister hi MP leh MLA bakah sorkar mipawimawh ṭhahnem takin an ṭawiawm a ni.