Nagaland sorkarin Municipal Act siam ṭha dawn

Nagaland Chief Minister Shur­hozelie Liezietsu chuan boruak muanawm tak hnuaiah Urban Lo­cal Body (ULB) election buatsaih a nih theih nan Nagaland Municipal Act siam ṭhat a nih tur thu a sawi.

Chief minister Liezietsu chuan, “Nagaland sorkar chauh chuan Municipal Act hnuaiah hian hmeichhe tan seat a hauhsak turin thuneihna a nei lo tih sawiin, hemi chungchangah hian Indian Parlia­ment chuan kum 1990 khan dan a lo pass daih tawh a ni" a ti. Hemi a nih avang hian ULB election-a hmeichhe tana seat 33% hauhsak hi state sorkar thutlukna a ni ngawt thei lo a ni, a ti. Municipal Act hi siamṭhat a ni dawn a, inthlan fel fai tak buatsaih tum a ni, a ti. CM chuan Nagaland Municipal Act hi civil society hrang hrangten nasa taka an dodal avangin siam ṭha turin hma lak a ni ta a ni, a ti.

T.R. Zeliang-a kaihhruai sorkar chuan kum 2016 khan ULB election-a hmeichhe tana seat 33% hausak a remti a, thutlukna hi tribal-te chuan nasa takin an dodal thung. Tribal-te chuan state sorkar thutlukna hi ram danpui kalh a nih thu an sawi a, tribal culture nena inmil lo leh pawm theih loh a nih thu an sawi. Kumin February thla khan election hi neih tura tih a lo ni tawh a, mahse tribal-te dodalna nasa tak avangin ṭhulh a ni. Tribal-te chuan chief minister T.R Zeliang-a chu thutlukna siam chungchanga mawhphurtu berah puhin bang turin an phut a, bandh an huaihawt bawk. Tribal lungawi lote hian sorkar building leh lirthei eng emaw zat an hal a, Zeliang pawhin banna a thehlut ta nge nge a ni.

Nagaland Tribes Action Commi­ttee (NTAC) hotu K.T. Vilie chuan ULB election-a hmeichhe tana seat hauhsak chu an dodal ber lo tih sawiin, Naga-te tradition leh custom te dal lo zawnga siam an duh tih a sawi. Nagaland hi kum 1963 khan state-ah hlan kai a ni a, state a nih hnuah legislator atan hmeichhia thlan an la ni ngai lo a, kum 1977 khan Rano M. Shaiza-i chu member of Parliament atan thlan tlin a lo ni tawh thung.