Arunachal leiminah mi 200 chhan chhuak

Arunachal Pradesh-a Bhaluk­pong bulah leimin avangin mi tam tak chhan chhuah ngaiin an awm a, Thawhṭanni khan Indian Army-te chuan mi 200 an chhan chhuak.

Defence official-in a tarlan danin chhan chhuah zinga mi 70 hi hmeichhia an ni a, naupang 50 an tel bawk. Bomdila Additional Deputy Commissioner, Bomdila chuan Pathianni zan khan hmun hnihah leimin nasa tak a thleng tih sawiin, mihring bakah lirthei 70 vel zet leimin hian a hnawl thu a sawi. He thil thleng avang hian nunna chan an awm hriat a ni lo a, hliam tuar eng emaw zat chu damdawi inah enkawl tura dah luh an ni. Defence Ministry thupuangtu Lt. Col Suneel New­ton chuan, leiminna hmunah hian chhan chhuah hna thawk turin sipai eng emaw zat tirh nghal an nih thu sawiin, an zingah hian Medical Officer pawh an tel tih a sawi.

Border Roads Organisation (BRO) chuan leimin thenfai hna hi an thawk. Leiminin lirthei a hnawl eng emaw zat chu lak chhuah a ni tawh bawk. He thil thleng hi chief minister Pema Khandu chuan pawi a tih thu sawiin, chhiat tawkte chu state sorkarin chhawmdawlna a ngaihtuahsak tur thu a sawi. Sorkar mi pawimawhte chuan leimin avanga chhiatna thlenna hmun hi an tlawh a, vanduaina tawkte ṭanpui dan kawng an dapsak a ni. Hliam tuar enkawl mek te pawh tlawhin, ṭanpuina an pe.

Tunhnaia ruahsur nasa tak avangin hmarchhak state hrang hrangah harsatna a thleng a, Assam, Meghalaya, Mizoram leh Arunachal Pradesh-te'n harsatna hi an tawk nasa zual a ni. Heng hmunah te hian leimin leh tui lianin chhiatna tam tak a thlen a, nunna chan an awm mai bakah, chenna in leh lo chan chhungkaw eng emaw zat an awm a ni. Assam khawpui Guwahati-ah chuan kar kalta chhung khan nunna chan mi panga an awm a, Mizoram-ah pawh nunna chan mi 10 vel an awm a ni. Hetihlai hian Meghalaya-ah pawh kar kalta chhung khan leiminin chhiatna a thleng a, mi pangain nunna an chan a ni. Sorkar laipui chuan hmarchhak state-a harsatna tawkte tan hian chhawndawlna pek a nih tur thu a puang tawh a ni.