AP Chief Minister-in Chakma-Hajong chungchangah all party meeting ko

Arunachal Pradesh Chief Minister Pema Khandu chuan Chakma leh Hajong hnam te chungchang ngaihtuahin Thawhṭanni khan CM conference hall-ah all party meeting a ko.

Meeting-ah hian BJP, INC, PPA, Trinamool Cong­ress, NCP, Aam Admi Party leh All Arunachal Pra­desh Students Union (AAPSU) aiawhte an tel a, sorkar mi pawimawh - Advocate General, Chief Secretary, Principal Secre­tary, Secretary leh IGP-te pawh an tel. Meeting hi dar kar ruk chhung zet neih a ni a, Union Minister of State for Home Affairs Kiren Rijiju pawhin he hun hi a hmanpui bawk. Kal khawm te chuan Chakma - Hajong te chungchang chu Ministry of Home Affairs-ah thlen an remti a, Joint High Powered Commi­ttee ngaihtuah turin an dah a ni. Chief Minister kaih­hruaina hnuaiah State High Powered Committee on Chakma - Hajong Refugee Issue din an remti bawk.

Union Home Ministry chuan Arunachal-a raltlan - Chakma leh Hajong hnamte chu India khua leh tui nihna pek a remti a, hei hi AP sorkar chuan nasa takin a dodal a ni. Ministry chuan heng refugee-te hi India ramah kum 50 an awm tlin tawh chuan ram danpui tlawh chhanin khua leh tui nihna pek theih niin a tarlang. Chakma leh Hajong-te hi tuna Bangladesh ni ta, East Pakistan-a Chittagong Hill Tract-ah an cheng ṭhin a, kum 1960 chhoa Kaptai dam project kalpui chuan an chenna ram tam tak a chim avangin Aruanchal-ah hian an rawn lut a ni. Chakma-te hi Buddhist an ni a, Hajong-te hi Hindu sakhaw zuitu an ni thung.