KNP area-ah lirthei tlanchak zawng bithliah

Assam-a Kaziranga National Park (KNP) area huam chhungah CrPC Section 144 tlawhchhanin lirthei tlan chak zawng bithliah a ni a, darkar khatah km 30 aia chaka tlan phal a ni lo. Hei hi ramsa te venhimna tura ruahmanna a nih thu tarlan a ni.

National Highway (NH) 37 chuan KNP hi a paltlang a, he kawngpuiah hian lirthei tlan chak zawng bithliah hi siam niin, kawngpui kiangah hian truck dah phal a ni lo bawk. Hei hian Golaghat district leh Nagaon district huam chhunga NH-37-in a paltlang zawng zawng a huam a ni. Khapna thupek hian mi mal leh sorkar lirthei a huam vek a, state pawn lirtheite pawh a huam vek a ni. Khapna hi sut a nih hma loh chuan KNP security-te chu kawngpui dungah hian duty tura hriattir an ni.

Jakholabondha - Bokakhat inkalpawhna National Highway (NH) 37 chuan KNP hi a paltlang a, he kawng zawhtute tan tlan chak theih zawng bithliah hi siam a ni. Bokakhat Sub-divisional Officer, Dhiraj Das chuan kum hmasa lamah pawh CrPC section 144 tlawhchhan hian lirthei tlan chak zawng bithliah siam a lo ni tawh

ṭhin tih sawiin, kumin pawh thupek hi chhuah leh a ni a, fur lai bik atana hman tura tih a ni, a ti. Brahmaputra leh Difloo lui lian avangin KNP hian kumtin harsatna a tawk ṭhin a, ramsa tam tak chu an himna zawngin kawngpuiah te an chhuak ṭhin a ni. Ramsa eng emaw zat chu lirtheia sut leh chil hlum an lo ni fo tawh a, hemi a nih avang hian ramsa te himna tur ngaihtuahin thupek hi chhuah a ni ta a ni. Ramsa te hian tui lian laka an himna turin hmun sang zawk an pan a ngai ṭhin a, Karbi Anglong district an pan ṭhin. Hemi thleng tur hian NH-37 an pal­tlang a ngai a, kawngpui an paltlangna lamah hian van­duaina an tawk chamchi a ni.

Hetihlai hian Thawhṭani khan Sonai Rupai Wildlife Sanctuary-a sai pakhat chuan park hungna bang tichhiain a vak chhuak a, chenna in a chil chhia a, mi pakhat a thi. He thil thlenna hi Assam Industrial Development Corporation (AIDC) complex bul, Sonitpur district chuan chung a ni. Thi hi Vimsen Munda (50) a ni a, kar kalta Inrinni khan hmeichhe pakhat - Arsolata Karmakar (45) chuan nunna a lo chan tawh bawk. Assistant Conservator of Forest, West Sonitpur Division Jasim Ahmad chuan he thil thlen hnu hian Forest Department official-te chuan thil awm dan an chhui zui nghal tih sawiin, park-a security te pawh venhimna khauh zawka kalpui tura hriattir an nih thu a sawi.