Assam-ah tui lian avangin Mi 60,000 velin harsatna la tawk

Assam-a tui lian chuan ziaawm lam pan tawh mah se, district paruka mi 60,000 zet chuan harsatna an la tawk nia tarlan a ni.

Chief Minister Sarbananda Sonowal chuan tui lian avanga harsatna tawk mek distrct paruka thuneitute chu Thawhṭannni khan meeting a neihpui a, chhawmdawl hna thawh dan turte an sawiho. Chief minister chuan heng district-a khaw 165 zet chuan tui lian avang hian harsatna an la tawk tih a sawi a, an chenna lailawkna tur ngaihtuahsak an nih thu a sawi. District tina Deputy Commissioner-te chu mipuite himna ngai pawimawh ber turin a ngen a, ei tur leh tui in tur bakah, damdawi thengin ngaihtuahsak zel a tiam a ni. Ṭanpuina sem chhuah mek zel a nih thu sawiin, tui lian avanga nunna chan chhungte pawh zangnadawmna pek an ni dawn tih a sawi.

Lakhimpur, Darrang, Karimganj, Nalbari, Udalguri leh Sonitpur District-te chuan tui lian hi an la tuar mek a, chenna in leh thlai chinna hmun eng emaw zat chu tui lian hian a chim tawh a ni. Assam State Disaster Management Authority chuan, thlai chinna hmun ram hectare 3,369 zet chu tui hian a chimpil tawh tih an sawi a, hmun tam takah tui lian hian hlauhawm chhinchhiahna an pel tih an sawi a ni. Relief camp hrang hrangah mi 3,000 vel dah an ni tawh tih sawiin, chhawmdawlna hna hi ngawrh taka kalpui mek zel a nih thu an tarlang. Tui lian hian lei dawh mek te pawh a hnawl nia tarlan a ni a, infrastructure a tihchhiat hlut zawng hi hriat theih mai a la ni lo.

Hetihlai hian Tripura-ah pawh chhungkaw 2,000 vel zet chuan tui lian avangin harsatna an tawk ve mek a, West Tripura district leh Khowai district-te chu a tuar nasa zual an ni. Chenna-in nei lo tan relief camp 50 vel siam a ni tawh a, ei tur leh tui thianghlim sem hna thawh reng a ni bawk. Disaster Management Control Centre official-te chuan Pathianni zana ruahsur nasa tak avang khan harsatna hian zual lam a pan tih an sawi. National Disaster Response Force (NDRF), Tripura State Rifles team leh state sorkar hmalaknain chhawmdawl hna thawh mek zel a ni. Hei bakah hian Howra leh Khowai lui te chu hlauhawm chhinchhiahna chung lamah an la luang a ni.

Chief Minister Manik Sarkar chuan hemi chungchangah hian Thawhṭanni khan high level meeting a ko a, chak zawka chhawmdawl hna thawh dan tur ngaihtuah a ni. Sarkar chuan district thuneitute chu control room siam tura ngenin, chhun zan zawma duty turin a ti. Meteorological Department Director Dilip Saha chuan an harsatna tawh mek hian eng chen nge a awh dawn an hriat loh thu sawiin, tunkar Ningani thleng hian ruah a la sur rin a nih thu a sawi.