Sikkim Democratic Front-te'n Gorkha-te thil phut an thlawp

Sikkim-a rorel lai Sikkim Democratic Front (SDF) chuan West Bengal, Darjeeling-a Gorkha-te'n Gorkhaland pek an phut chu an thlawp thu an sawi.

Sikkim khawpui Gangtok-ah SDF-te hian meeting an nei a, Darjeeling-a nawrh huaihawtin an state a ngawng dan hrang hrangte an sawiho a, hetih rual hian Gorkha-te hmalakna chu an thlawp thu an sawi. Sikkim Assembly chuan March 29, 2011 khan Gorkhaland pek chungchangah hian resolution an lo pass tawh a ni. SDF chuan sorkar laipui leh West Bengal sorkar chu an chakkhai lamna kawngpui pawimawh National Highway (NH) 10 (Siliguri - Gang­tok) dan chah a nih loh nana hma la turin an phut tih an sawi. NH 10 hi Darjeeling panna kawngpui a nih bawk avangin NH hi hun rei zawk dan chah mai an hlauthawng a ni. Thawhṭanni khan NH hi dan a lo ni tawh.

Gorkha Janamukti Morcha (GJM)-te bul tuma Darjeeling-a lungawi lohna lantir hian zual lam a pan zel avangin Sikkim Tourism Deparment chuan harsatna an tawk niin an sawi. Tourism Minister Ugen T. Gyatso chuan buaina chhuak mek hian khualzin te tan harsatna a thlen mek a, Sikkim - Siliguri inkara tlan ṭhin khualzin phur bus eng emaw zat chu an tangkhang tih a sawi.

Hetihlai hian Sikkim Trinamool Congress president PT Lucksom leh general secretary Tshering Wangchuk Lepcha te chuan an party-in Gorkha Janamukti Morcha (GJM)-te hmalakna an thlawp avangin an nihna aṭangin an ban thu an sawi. Wangchuk Lepcha chuan Sikkim mipuite hmakhua a ngaih avangin a nihna chu a bansan ta tih a sawi a, Gorkha-te hma lakna chu a thlawp ve lo tih a sawi. Hetih rual hian Nationalist Sikkim United Organisation (NSUO)-te hmalakna chu a thlawp zel tur thu a sawi bawk.