Assam : Kum 2016-17 chhungin thubuai ziah luh 12,229 awm

Hmarchhak state zinga mihring tamna ber Assam-ah chuan kum 2016-17 chhung khan thubuai hrang hrang 12,229 ziahluh a ni.

Assam police-te chuan kum 2016-17 chhunga thubuai ziah luh hi kum 2015-16 chhunga ziah luh aiin 3%-in a tlem zawk tih an sawi. Kum 2015-16 chhung khan thubuai hrang hrang 12,628 zet ziah luh a ni a, 2014-15 chhungin case register 12,256 a awm bawk. Home Deparment tarlan danin tun hnai kum thum chhungin Assam-ah hian tualthahna thleng zat chu kum tin a tlahniam. Kum 2014 chhungin tualthah thubuai ziahluh 1,427 a awm a, hei hi a kum leh­ah chuan 1,263-ah tla­hniamin, kum 2016-ah chuan tualthah case ziah luh zat hi 1,157 chauh a ni tawh. Pawngsual leh a kaihnawiha thubuai ziahluh pawh kum thum chhung hian a tlahniam a, 2014 (1,988), 2015 (1,801) leh 2016 (1,719)-te a ni.

Assam-ah hian mihring pung zel mah se pawikhawihna thleng erawh a tlem tial tial niin a lang. Kum 2014-a tharum thawhna leh inrikrapna thleng zat report chu 2,521 a nih laiin, kum 2015-ah chuan 2,056-ah a tlahniam a, nikum khan hemi kaihhnawiha thubuai ziahluh hi nasa takin a tlahniam a, case 1,487 chauh ziah luh a ni. Mi suam leh inrawkna thleng report pawhin hniam lam a pan a, kum 2014-ah thubuai 285 zet ziah luh a nih laiin, kum 2016-17 chhung khan case 156 chauh ziahluh a ni.

Hetihlai hian mi ruk bo, pawisa lem leh a kaihhnawih thubuai erawh a pung thung a, kum 2015-16 chhung khan mi rukbo leh mihring hmanga sumdawnna kaihhnawih thubuai 6,040 ziahluh niin, hei hi kum 2016-17-ah chuan 6,295-ah a kai chho a ni. Pawisa lem kawl leh tawlhruk thubuai ziahluh punna chu 47% zet a ni a, kum 2016-17 chhung khan pawisa lem hi cheng 23,42,930/- zet man a ni.