Manipur : India-Myanmar ramri km 5.6-a thui hung a ni tawh

Manipur chief minister N Biren Singh chuan Manipur-a Tengnoupal district-a India-Myanmar ramri, border pillar no 79 leh 81 inkar, km 5.6 thui chu hung zawh a ni tawh tih a sawi.

Legislative Assembly session neih mekah, Thawhlehni khan MLA K Ranjit Singh zawhna chhangin Leader of the House ni bawk, CM Singh chuan hei hi a sawi a ni.

Manipur state-a India leh Myanmar inrina hi km 390 vela thui a ni a, heng aṭang hian km 60.02-a thui hungna chu union home ministry-in a tum dawn a ni. Mahse ramri hung hna thawh hi ram pahnihte inkarah ram inchuhna te a awm ṭhin avangin an thawk chak thei lo tih Biren chuan a sawi bawk.

Chief Minister chuan an state-a minority-ah Muslim, Kristian, Jain, Parsis, Buddhist leh Sikh-te an tel tih sawiin, minority affairs ministry-a rawtna an thehluh hnuah state sorkar chuan minority tan scheme hrang hrang a siam thu Assembly-ah hian a sawi lang bawk. Heng scheme zingah hian 'Minority Pre-Matric Scholarships Scheme', 'Minority Post-Matric Scholarships Scheme', 'Minority Merti-cum-Means Scholarship Scheme' leh 'Pradhan Mantri Jan Vikas Karyakaram (PMJVK)' te an tel.