Tripura-in DA 5% a tihsanna tur a pawm

Nakkuma state assembly inthlan nei tur, Tripura-a BJP sorkar chuan state sorkar hnuaia hnathawkte leh pensioner-te dearness allowance (DA) 5%-a tihpun rawtna a pawm.

Information and cultural affairs minister Sushanta Chowdhury chuan July 1 aṭanga hman ṭan tura DA tihpun rawtna hi Thawhlehnia state cabinet meeting-in a pawm tih sawiin, DA tihpun avang hian state sorkar chuan kumtin Rs vbc 523.80 a sen belh dawn a ni, a ti.

DA tihpun hi sorkar hnathawk 1,04,683 leh pensioner 80,855-ten an chhawr dawn a ni.

Cabinet-in DA tihpun a remtih tak avangin Tripura state sorkar hnuaia hnathawkte DA hi 3% aṭangin 8% ah a pung dawn a ni. Hetih lai hian central sorkar hnuaia thawkte chuan DA hi basic pay aṭanga 34% a la a, central leh state sorkar hnuaia thawkte DA lak inthlauhna hi 26% a la tling tho a ni.

Tripura Government Employees' Federation (TGEF) chuan state sorkarin DA tihpun a remti chu lawmawm an tih thu an sawi a, hemi rual hian central sorkar hnuaia thawkte nena an DA lak la inthlau lutuk chu state sorkar pawhin a ngaihtuah zui zel an beisei tih an sawi.