KHADC-in bawng chungchangah resolution pass

Meghalaya-a Khasi Hills Autonomous District Council (KHADC) chuan Ningani khan sorkar laipuiin hralh leh talh atana bawng hman khapna thupek a tichuah duh lohna lantirin resolution an pass.

KHADC thuchhuah chuan bawng hrah leh talh khapna chu an pawm thei lo tih sawiin, tribal-te nunphung leh ziarang rahbehsak tumna a ni, an ti. Council member-te chuan sorkar laipui thuchhuah hi ngun taka an sawiho hnuah resolution an siam a, member-te chuan lungrual takin an pass a ni. KHADC chairman L G Nongsiej chuan resolutuion pass a ni chu lawmawm a tih thu sawiin, member-te chuan lungrual taka sorkar laipui thutlukna an dodal zel a beisei thu a sawi. BJP aṭnga council member awm chhun Neil Antonio War pawhin sorkar laipui thupek hi a pawm loh thu sawiin, sut leh tura a duh thu a sawi ve bawk.

Meghalaya hi hmarchhak state zinga sorkar laipui thupek dodalna sa ber pawl niin, hmun hrang hrangah lungawi lohna lantir a lo ni tawh. Pawl hrang hrangte chuan tribal-te rahbeh tumna a nih thu te an sawi a, bawng hmanga sumdawnna chu an eizawnna pawimawh a nih thu an sawi. BJP hruaitu zingah pawh sorkar laipui thuchhuah thlawp lo eng emaw zat an awm a, party chhuahsan phah hial te pawh an awm a ni. Meghalaya bakah hian hmarchhak state ṭenkhatah pawh dodalna hi lantir a lo ni fo tawh bawk.

Meghalaya-ah hian Autonomous District Council pathum awmin, KHADC hi bawng hralh leh talh khapna chungchanga resolution pass hmasa ber an ni. Meghalaya assembly pawhin June 12 khan resoltion hi a lo pass tawh bawk.