Assam-ah tui lian avangin mi pakhat thih belh leh

Assam-a tui lian chuan ziaawm lam pan tawh mah se, nimin zing khan mi pakhin nunna a chan leh.

Assam State Electricity Board (ASEB) chuan tui lian hian electric ban eng emaw zat a titlu tih sawiin, hei hian hmun tam takah harsatna a thlen a ni, an ti. Nimin zinga nunna chan pawh hi electric-in a man hlum a ni. Electric wire eng emaw zat chu tuiin a chim avangin mihring tan a hlauhawm hle nia tarlan a ni a, tunn hnaia tui lian avanga thi zinga mi pathum chu electric-in a man te an ni. ASEB chuan mipuite chu fimkhur tirin an chah ve reng bawk. Tui lian hian ziaawm lam pan tawh mah se, district paruka mi 60,000 zet chuan harsatna hi an la tawk nia tarlan a ni.

District hrang hranga khaw 165 vel zet chuan tui lian avang hian harsatna an la tawk mek a, ṭanpuina sem pawh chhunzawm zel a la ni. Lakhimpur, Darrang, Karimganj, Nalbari, Udalguri leh Sonitpur District-te chuan tui lian hi an la tuar mek a, chenna-in leh thlai chinna hmun eng emaw zat chu tui lian hian a chim tawh a ni. Assam State Disaster Management Authority chuan, thlai chinna hmun ram hectare 3,369 zet chu tui hian a chimpil tawh tih an sawi a, hmun tam takah tui lian hian hlauhawm chhinchhiahna an pel tih an sawi a ni. Relief camp hrang hrangah mi 3,000 vel dah an ni tawh tih sawiin, chhawmdawlna hna hi ngawrh taka kalpui mek zel a nih thu an tarlang. Tui lian hian lei dawh mek te pawh a hnawl nia tarlan a ni bawk.