KNP-ah samak thiin an chhar

Assam-a Kaziranga National Park-ah forest guard-te chuan Nilaini khan samak ruang an chhar leh a, a ki chu sapeltuten an la a ni.

Forest guard-te chuan patrolling an neihnaah samak thi hi an chhar tih an sawi a, sapeltute hi chhui zui nghal an nih thu an sawi. Divisional Forest Officer KNP, Ruhini Ballav Saikia chuan sapeltute pawikhaihna thleng ṭhin chu pawi a tih thu sawiin, venhimna pawh khauh zawk­a ken kawh a nih tur thu a sawi. Park chhungah hian anti-poaching camp 170 zet din a nih tawh tih sawiin, sapeltu mi panga kahhlum an ni tawh tih a sawi bawk. Kum 2016 chhung khan sapeltu mi 64 man an lo ni tawh tih sawiin, KNP-ah hian samak 18 kahhlum an nih thu a sawi.

Chief Minister Sarbananda Sonowal chuan sapeltute chetna chu a dem thu sawiin, chhui zui an ni ang a, man chhuah an nih chuan na taka hrem an ni ang, a ti. Sonowal hian Kaziranga National Park enkawltute bakah, Golaghat leh Nagaon district-a thuneitute chu meeting a lo neihpui tawh a, ramsa te himna tura hmalak dan tur hrang hrang an sawiho a ni. Kaziranga National Park hi World Heritage site-ah puan a ni tawh a, ram chhung leh pawn aṭang tein tlawhtu an ṭhahnem thei hle.