Assam-ah thamna sum latu sorkar officer 2 man

Assam-a Cachar leh Kamrup district-ah Nilaini khan sorkar hnathawk pahnih, thamna latu man an ni tih police-ten an sawi.

Cachar-a Lakhimpur area-a forest range officer Debabrata Gogoi chu thamna sum a dawng lai hi hmuh a ni a, mahse Directorate of Vigilance and Anti-Corruption mi leh sate a hmuh chuan a chamber aṭang hian a pawisa dawn nen hian a tlanchhe zui a ni. Police team-in umzui nghalin, km 1 chuang an um hnuah an man tih Special Director General of Police (Law and Order) GP Singh chuan a sawi. Eirukna umbo tumin an bei zel dawn a, sorkar hnathawk eirute chu an tlanchhe thei lo tih Singh chuan a sawi zui bawk.

Nilaini vek khan Kamrup district-a Nagarbera Revenue circle-a thawk, Madan Nath pawh thamna sum a dawng lai man a ni tih Singh chuan a sawi bawk a ni.

Sorkar hnathawk ṭhate chawimawina hlan dawn
Assam sorkar chuan eirukna umbo tura beihpui a thlak mek karah, sorkar hnathawk ṭha thlan chhuahte chawimawina a hlan dawn.

State sorkar chuan state level-ah non-gazetted employee 10 leh district level-ah mi 89-te chu hnathawh ṭhat lawmman hi a pe dawn. Lawmman atan hian pawisa fai Rs 25,000 leh citation pek an nih bakah, an service kum khatin a pawhsei sak bawk ang.

Sorkar hnathawk ṭha chawimawina, ‘Lok Sewa Puraskar,’ hi vawiina Lok Kalyan Divas an hmannaah hlan an ni ang. Chawimawina dawngtu thlang tur hian panel pahnih - Screening Committee leh State-level Committee din a ni.