Arunachal sorkarin Kumin chhungin eng pek vek tum
Arunachal Pradesh Chief Minister Pema Khandu chuan kumin chhung ngein an state chhunga eng la luh lohna khua zawng zawngah eng pek vek an nih tur thu a sawi.
Arunachal Pradesh CM Khandu leh Rural Electrification Corporation Limited (REC) Chairman and Managing Director, Dr P.V. Ramesh-te chu meeting an nei a, he thu hi Khandu chuan a sawi a ni. Meeting-ah hian sorkar laipui scheme Deen Dayal Upadhyaya Gram Jyoti Yojna (DDUGJY) hnuia hmalakna kalpui mek dan an sawi dun a, kumin chhung ngeia khawtinin eng an hmuh theih nan hmalak a nih tur thu an sawi. Chief Minister chuan DDUGJY scheme hnuiah hian khaw pariat-ah eng pek a ni tawh tih sawiin, heng khuah te hian tun hma lamin power supply ala awm ngai lo tih a sawi. Chief Minister chuan July chawlhkar hmasa berah meeting hi neih leh a nih tur thu a sawi a, rural electrification programme chu chak zawka kalpui a nih tur thu a sawi bawk.
Arunachal Pradesh hi India ram state zinga eng la luh lohna khua tamna ber niin, khaw 1,230 zet-ah eng a la lut lo a ni. DDUGJY hnuiah hian khaw 335-ah power grid hmangin eng pek tum a ni a, a bak khaw 895-ah chuan ni chakna hmanga eng pek tum a ni.