Meghalaya CM-in Tripura CM thawhpuiah sawm

Meghalaya Chief Minister Mukul Sangma chuan a ṭhenawm state Tripura sorkar hnenah ngenna thawnin, sorkar laipuiin zawrh leh talh atana bawng hman a khap chungchangah thawh­puiah a sawm.

Meghalaya CM Mukul Sangma chuan a kaih­hruai sorkar chuan sorkar laipui thupek chu an thlawp lo tih Tripura CM Manik Sarkar a hriattir a, Tripura sorkar chu khapna thupek thlawp lo turin a ngen ve bawk. Sangma chuan sorkar laipuiin Prevention of Cruelty to Animals (Regu­lation of Livestock Markets) Rules, 2017 tlawhchhana ram puma hralh leh zawrh atana bawng talh a khapna chu dan kalh a nih thu a sawi. Khapna hian bawng hmanga eizawng mi tam tak a nghawng tih sawiin, sakhaw zalenna inrahbeh sak tumna a nih thu a sawi bawk.

Meghalaya-a opposi­tion party National Peo­ple’s Party (NPP) chuan sorkar laipui thupek hi an thlawp loh thu an lo sawi ve mek bawk a, Meghala Bharatiya Janata Party (BJP) pawhin an thlawp loh thu an sawi. NPP hruaitu Lok Sabha MP Conrad K. Sangma pawhin hemi chungchang hi Prime Minister Naren­dra Modi hnenah a thlen a, Kristian sakhaw zuitu tamna hmarchhak state-ah chuan thupek hi zawm ve theih a ni lo, a ti. Meghalaya hi hmarchhak state zinga bawng talh khapna dodal nasa ber a ni.

Tunhnai khan Khasi Hills Autonomous District Council (KHADC) chuan sorkar laipui thupek duh lohna lantirin resolution an pass. KHADC-te chuan bawng hrah leh talh khapna chu an pawm thei lo tih sawiin, tribal-te rahbeh tumna a ni, an ti. Pawl hrang hrangte pawhin tribal-te rahbeh tumna a nih thu te an sawi a, bawng hmanga sumdawnna chu an eizawnna pawimawh a nih thu an sawi.

Ministry of Environ­ment and Forests chuan Prevention of Cruelty to Animals (Regulation of Livestock Markets) Rules, 2017 tlawhchhanin May 23 khan rampuma hman turin hralh leh tarlh atana bawng hman khapna hi a tichhuak a ni.