Sorkar laipui chuan Tri­pura-a Akhaura canal aṭanga Bagngladesh-a tui luang lut tih thianghlimna tur­in reatment plant a din dawn. 
He plant siam nan hian Union Urban Develop­ment Ministry chuan cheng vaibelchhe 18.36 a pe dawn a, kum hnih chhunga zawh hman tura ruahman a ni. Bangladesh sorkar chuan treatment plant siam tur hian Tripura sorkar chu a lo ngen tawh a, hei hi bawhzuiin Tripura sorkar chuan sorkar laipuiah Detail Project Report (DPR) a thehlut a ni. Hemi chungchang ngaihtuah hian May 22 khan Bang­ladesh-a Comilla-ah District Magistrate-level meeting neih a lo ni tawh bawk. Bangladesh sorkar ngenna hi sorkar laipui chuan pawmin, Urban Development Ministry chuan plant dinna tur sum hi a ruahman ta a ni. 
Akhaura canal hi Tri­pura leh Bangladesh-te bungraw inthawn tawnna atana siam a ni a, mahse canal aṭang hian Tripura khawpui Agartala aṭangin Bangladesh-ah hian tui bawlhhlawh nasa takin a lunglut a ni. Hei hi Bang­ladesh sorkar chuan duh loin, titawp turin hma a la ta a ni. Bangladesh Akhaura Dakshin (south) Union Board Chairman, Mohammad Jallaluddin chuan an ram chhunga thlai chinna hmun ram hectare 1,500 vela zau chu canal aṭanga tui lak hmanga chawm a nih thu a sawi. Mahse heng tui te hi a bawhhlawh avangin tihtawp a ni dawn a ni, a ti. Tripura aṭanga hian Akhaura canal bakah lui lian dang pariat ze chu Bangla­desh ramah hian an luang lut a ni.