Assam-ah Bamboo Technology Park hawng

Assam Chief Minister Sarbananda Sonowal chuan Ningani khan an state-a Bamboo Technology Park hmasa ber a hawng.

Chaygaon-a industrial growth centre-ah park hi din a ni a, a din nan hian cheng vaibelchhe 62.28 senral a ni. Assam CM Sonowal chuan India rama mau awm zawng zawng aṭanga 66% chu hmarchhak huam chhunga awm a nih thu sawin, Bamboo Technology Park pawh chu ṭangkai taka hman a beisei thu a sawi. Mau chu thil siam chhuah nana ṭangkai tak a nih thu sawiin, Micro, Small and Medium Enterprises leh paper plant te'n an chawrṭangkai hle dawn a ni, a ti. Kut themthiam leh mau hmanga thil siam chhuaktute pawhin ṭangkai taka an hman a besei tih a sawi.

Bamboo Technology Park hi Industries and Commerce department chuan Union Department of Industrial Policy and pro­motion hnuia a din a ni. A hawnna hun hi industry minister Chandra Mohan Patowary chuan a hmanpui a ni. Patowary chuan state chhunga Bamboo Technology Park hmasa ber hawn a ni ta chu lawmawm a tih thu sawiin, hei hian mi tam tak tan hna a hawn sak dawn niin a sawi.