Arunachal : Hollongi greenfield airport 'Donyi Polo' tiin vuah dawn

Arunachal Pradesh sorkar chuan Hollongi-a greenfield airport siam mek chu “Donyi Polo Airport, Itanagar”tia vuah a remti.

Airport hming tur hi social media lamah thla hnih chhung zet sawiho a ni a, Ningani khan chief minister Pema Khandu kaihhruaiin cabinet meeting chuan 'Donyi Polo' tih hi an pawm ta a ni.

Chief Minister Office chuan thuchhuah siamin, an state khawpuia airport awmchhun ni tur chu an state tradition leh cultural heritage tarlanna tur pakhat a ni tiin, hei vang hian Sun (Donyi) leh Moon (Polo) tih chu vuah a ni dawn tih a tarlang.

CM Khandu hian May thla khan union civil aviation minister Jyotiraditya Scindia hnenah Greenfield Airport hi 'Donyi Polo' airport tia vuah turin rawtna a lo thehlut tawh a ni. Hemi hnu hian social media lamah nasa taka sawiho a ni a, state mipui tam zawkin an thlawp laiin, midang eng emaw zatin hming dang vuah an rawt ve leh bawk.

He airport hi Itanagar khawpui aṭanga km 15 vela hlaa awm niin, kum 2019 February thla khan prime minister Narendra Modi chuan a sakna tur lungphum hi a lo phum tawh a ni.

Sorkar laipui chuan Capital Connectivity Scheme hnuaiah airport sakna tur hi a pawm a, hna thawh nghal ni mah se Covid-19 hri lengin hun eng emaw chen a tikhaihlak a, tunah hian zawhfel a ni tep tawh a, August 15-a hman theih tura peih tum a ni.

Ram hectare 320-a zaua siam, he airport hi zawhfel a nih hunah chuan Airbus 321 leh khawvela passenger aircraft lian ber zinga mi Boeing 747-te pawh an ṭum thei dawn a ni. July 19 khan Dornier aircraft chuan flight test landing hi a lo nei tawh bawk.