Assam sorkarin Walmart, Flipkart leh HCL-te MoU ziahpui

Assam sorkar chuan an state-a entrepreneurship chawilarna leh ṭhalai tana hna thawh tur tam zawk kawng hawnna turin Walmart, Flipkart leh HCL-te memorandum of understanding (MoU) a ziahpui.

Ningani khan Assam Skill Development Mission office-ah MoU hi an ziak a ni. Walmart hian MSME tihhmasawnna turin, an thil siamchhuahte phochhuah leh thawnchhuah kawngah a pui dawn a ni.

Flipkart hian ṭhalaite tan Flipkart Supply Chain Operations Academy-ah training-te pein, e-commerce supply chain talent pool a siam bawk ang. Flipkart-a on-the-job training nei tura thlante chuan an training chhungin stipend, thla tin Rs 17,500 an la bawk ang.

Hindustan Computers Limited (HCL) hian Assam-ah hian an programme hrang hrang buatsaihna huaiah ṭhalai, class 12 pass chinte tan hnathawh tur a siamsak bawk ang. Hei bakah hian DECT nena thawkdunin, skill development lamah zirlaite training an pe dawn bawk a ni.

Assam Skill Employment Entrepreneurship Department minister Jayanta Malla Baruah chuan an state chuan MSME lamah theihna sang tak a nei tiin, sorkar pawhin MSME sector tihhmasawnna turin theihtawp a chhuah a ni, a ti.