Guwahati-a traffic tawt tihziaawm dan ngaihtuah turin Gauhati HC-in member pathum awmna panel a din

Gauhati High Court chuan Assam khawpui, Guwahati-a traffic tawt lutuk tihziaawm dan ngaihtuahtu tur member pathum awmna committee a din.

Court chuan Rita Das Mozumdar petition thehluh, Guwahati khawpuia traffic tawt lutukin mipui nunphung a tihbuai leh harsatna a thlen chungchang hearing a neihah, committee dinna tur thupek hi a tichhuak ve nghal a ni.

Court chuan officer pathum awmna committee hian khawpui chhunga traffic dinhmunte zirchiangin, traffic tawt tihziawmna tur hian rawtna an siam dawn a ni. Committee member atan hian DCP (Traffic), Guwahati City, Deputy Municipal Commissioner, GMC bakah Assam State Legal Services Authority-in officer pakhat a nominate an awm dawn a ni.

Assam transport secretary Adil Khan leh IGP Nitul Gogoi-te chu nodal officer atan ruat an ni bawk.

Committee hi khawpui chhunga kawngpui lun lai, bazar leh hmun dang dang, traffic tawt zualna ṭhin hmunte tlawh kual a, a chinfel dan tur rawtna siam turin tih a an ni. A ṭul a nih chuan committee member-te hian an police-te puihna pawh an dil thei ang, tiin court chuan a sawi. August 22-ah a report hmasa thehlut turin a ti bawk a ni.