Tripura-in breast milk bank siam dawn

Nausen piang hlimten nu hnute tui hnek tur an neih vek theihna turin, Tripura sorkar chuan Agartala khawpuia Indira Gandhi Memorial Hospital (IGM)-ah breast milk bank a siam dawn. Hmarchhak biala breast milk bank hmasa ber a ni ang.

IGM Hospital-a Rogi Kalyan Samiti chairman, gynecologist Dr Dilip Kumar Das chuan nu, nau nei tharte chu naute chu an hnute tui ngei pe tur leh, hei hi nausen tana ṭha ber a nih thu an hrilh fo tih a sawi. Mahse nu ṭhenkhat chuan taksa lama harsatna an neih avangin an nau neih tharte pawh hnute tui an pe thei lo a, hei vang hian nausente hian nu hnute tui ngei an hnek vek theihna turin, hnute tui dahṭhatna, breast milk bank hi siam an tum tih a sawi a ni.

Dr Das chuan, breast milk bank chu blood bank nen an inang deuh tih sawiin, nu nau nei hlim, chhan eng emaw avanga naute hnute pe thei rih lote hnute tui chu dah ṭhain, naute hnek tur hian pek a ni thei dawn tih an sawi. Hnute tui dahṭhatte chu uluk taka sawngbawl vek a ni dawn a, an dahṭhatte chu a vaiin naute hnek turin a him em tih a sample aṭangin an endik leh vek dawn tih a sawi bawk.