Sikkim CM-in GJM-te hmalakna thlawp HM hnenah West Bengal sorkar a zualko

West Bengal sorkar chuan Chief Minister Pawan Kumar Chamling-a kaihhruai sorkarin Gorkha Janamukti Morcha (GJM)-te hmalakna a thlawp chu a dem thu sawiin, hemi chungchangah hian kar kalta Zirtawpni khan Union Home Minister Rajnath Singh hnenah an lungai loh thu ziakin a thlen.

Sikkim Chief Minister Pawan Kumar Chamling-a kaihhruai sorkar chuan GJM-te hmalakna a thlawp thu hi a lo sawi tawh a, hei hi West Bengal sorkar chuan a hrethiam lo hle. West Bengal Parliamentary Affairs Minister Partha Chatterjee chuan Chief Minister Mamata Banerjee aiawhin Home Minister hnenah hian lehkha a thawn a, Sikkim sorkar chet dan an dem thu leh, GJM-te an thlawmna sut leh tura an phut thu a thlen a ni. Chatterjee chuan, GJM-te'n state hran pek phuta lungawi lohna an lan tir chu pawi a tih thu sawiin, tawpsan tawh tur a duh thu a sawi. Lungawi lohna lantira buaina chhuak ṭhin tih tawp an duh thu sawiin, mi tam takin harsatna an tawk chu thil pawi tak niin a sawi. He thil theng avang hian mi tam takin harsatna an tawk a, nunna chan pawh an awm a ni, a ti.

Hetih rual hian Pawan Chamling-a'n GJM-te a thlawp thu a lo sawi hi boruak tisosang thei thil a nih thu Chatterjee chuan a sawi. GJM-te fuih pawrh zawnga cheah Sikkim sorkar chu puhin, buaina thleng mek denchhena hamṭhatna lo zawngah a puh. Darjeeling-a buaina chhuak mek tireh tur hian Rajnath Singh chu chak zawka hma lakpui turin a ngen bawk a, buaina chu chinfel thui a nih loh chuan a punlun zel dawn tih a sawi.

Hetihlai hian Siliguri aṭnga Sikkim leh Darjeeling pan-a tlan lirthei eng emaw zat chu an tangkhang a, hei vang hian khualzin tam tak an buai phah a ni. A bikin West Bengal sorkar hnuia in register lirthei te chu Sikkim leh hmun dang pan lo tura dan an ni a, hei hian nunphung a tikhaihlak nasa hle. Sikkim register car eng emaw zat chu tihchhiat an ni a, Sikkim Nationalised Transport (SNT) bus-te pawh Siliguri-ah din tir an ni.

SNT additional general manager, H L Lamichaney chuan bus leh mi mal lirthei te chu fimkhur thilah tlan lo tura hriattir an nih thu a sawi. Khualzin tangkhang eng emaw zat an awm avangin venhimna hnuaiah lirthei te hi tlan tir leh thuai tum an nih thu a sawi bawk.

Arunachal Pradesh-a Gorkhali-te pawhin GJM-te an thlawpna lantir nan Inrinnni khan Itanagar-ah kawng an zawh a, Gorkhaland state din chu an thlawp thu an sawi. Kawngzawh hi IG Park aṭanga neih ṭan niin, Itanagar Monastery-ah tihtawp a ni a, June 17-a police-te nena innawr buaina thlenga nunna chan ta mi pathum te hriatrengna hun buatsaih a ni bawk. All Arunachal Pradesh Gorkha Youth Welfare (AAPGYWA) president Shyam Ghatani chuan GJM-te hmalakna hi an thlawp zel tur thu a sawi. AAPGYWA chairman Chanbir Sonar pawhin Prime Minister Narendra Modi chu a lo intiam tawh tihlawhtling tura hmala tura an phut thu a sawi. BJP chuan kum 2014 Lok Sabha election-ah khan Gorkhaland pek a lo tiam tawh a ni.

Tripura-a tribal pawl hrang hrangte chuan Tripura Tribal Areas Autonomous District Council (TTAADC) area huam chhung hmun hrang hrangah GJM-te hmalkna an thlawpna an lantir ve bawk. State chunga hmun 29 zetah thlawpna hi lantir a ni a, state hran din an thlawp thu te, West Bengal sorkar an demna thu te an auchuahpui a ni. Kawngzawh huaihawt a nih avangin hmun tam takah nun phung a khaihlak phah nasa hle. Hetihlai hian state chhunga political party hrang hrangte chuan GJM-te thil phut hi an thlawp loh thu an sawi thung.

Gorkha Janmukti Morcha (GJM)-te'n Gorkhaland state phuta lungawi lohna an lantir avang hian mi tam takin harsatna an tawk a, venhim hna thawk tur mi eng emaw zat tirhluh an ni tawh bawk. Nawrh huaihawt a nih vang hian inkalpawhna kawngpui pawimawh National Highway chu dan a ni a, hei hian harsatna tam tak a thlen a ni.