Assam-ah tui lianin ziaawm lam la pan lo

Assam-a tui lian chuan kar kalta Inrinnni thleng khan ziaawm lam a la pan tak tak thei lo a, Lakhimpur, Karimganj leh Sonitpur district-a mi 87,500 vel zet chuan harsatna an la tawk a ni.

Assam State Disaster Management Authority (ASDMA) chuan heng district pathum-a khaw 131-te chuan harsatna hi an la tawk mek tih sawiin, mi tam tak chuan an himna tur zawngin an in leh lo an chhuahsan tih a tarlang. Hengmite tan hian state sorkar chuan relief camp eng emaw zat a siam tawh a, eitur leh tui in tur te pek an ni. Hmun eng emaw zatah chhanchhuah hna thawh reng a la ni a, awmna mumal nei lote tan hmun buatsaih sak an ni. Tui lian hian hectare 148 vel zeta zaua thlai chin a tichhe tawh bawk.

ASDMA-te chuan May 31-a tui lianin a lenbo ruang chu tunhnai khan hmuh a nih thu an sawi. Tui lian avang hian mi eng emaw zat an thi tawh a, an zinga ṭhenkhat chu tui lianin electric ban a len tluk avanga current-in a man hlum an ni a, an zingah hian zirlai pawh an tel. Chief Minister Sar­bananda Sonowal chuan current man avanga nun­na chan chhuntgte henah zangnadawmna pek an nih tur thu a lo puang tawh a, tui lian avanga nunna chan leh chhiat tawk te pawh theih ang anga ṭanpuina pek an nih tur thu a sawi bawk.