AP-ah Chakma leh Hajong-ten nawrh huaihawt

Arunachal Pradesh sorkarin an state-a Chakma leh Hajong hnam hnena Residential Proof Certificates (RPC) pek chhuah ṭhin titawp tura a hriattir avangin, kar liam ta Inrinni khan Diyun, Changlang district-ah Chakma leh Hajong-ten nawrh an huaihawt.

All Arunachal Pradesh Students Union (AAPSU)-in state sorkar hnenah Chakma leh Hajong hnamte hnena RPC pekchhuah titawp tura phutin, an thil phut hi tihhlawhtlin a nih loh chuan state puma nawrh huaihawtah an vau a ni. Hemi hnu hian state sorkar chuan RPC pek chhuah titawp tura thupek hi a tichhuak a ni.

Chakma-Hajong organisation chuan he thupek hi Arunachal Pradesh aṭanga paihchhuah an tumna policy a ni tiin, lungawi lohna hi an lantir a, Chakma Hajong Rights Alliance thupuangtu Krishna Chakma chuan dan hmanga rorelna ramah hetiang thil hi phal a ni lo, a ti.

RCP pekchhuah tihtawp chu zirlai, hna zawngte'n an tuar nasa ber dawn niin Arunachal Pradesh Chakma Students Union (APCSU) president Rup Singh Chakma chuan a sawi a, "India khua leh tui dik takte niin, sipaiah pawh an lut fo a ni. Mahse RPC pekchhuah an ni loh chuan Indian Army-in sipai lak runpui a neih ṭan leh hunah pawh an dil ve thei dawn lo a ni," tiin a sawi. Hetianga inthliarhranna hi an pawm dawn lo tih Chakma zirlai pawl chuan an sawi.

Arunachal Pradesh-ah hian Chakma leh Hajong hnam hi 65,000 vel awm mekin, hengte hi East Pakistan aṭanga lutte niin, India sorkar chuan hetih laia North East Frontier Agency (NEFA) tih, Arunachal Pradesh-ah hian a dah a ni. India khua leh tui nihna pek ni mah se, Arunachal Pradesh chuan a pawm thei lo. Kum 1996, January 9 khan Supreme Court chuan citizenship application chu kalpui turin a ti a, mahse tun thlengin application hi kalpui a ni lo. Kum 2021 khan Arunachal Pradesh Chief Minister chuan heng hnamte hi state pawn lamah awm tir an ni dawn tih a puang zawk a, hemi kalpuina atan hian RPC pekchhuah pawh hi an titawp a ni.